logo_geo
პრინცი ჰარი: მე დავკარგე დედა, ახლა კი ვუყურებ, როგორ ხდება ჩემი ცოლი იმავე ძალების მსხვერპლი
- +

2 ოქტომბერი. 2019. 13:19

 

სასექსის ჰერცოგინიამ ბრიტანულ გაზეთს „Mail on Sunday“-ს უჩივლა. მეგან მარკლი თვლის, რომ გამოცემამ მისი წერილი უკანონოდ გამოაქვეყნა.

 

მისი მეუღლის, პრინცი ჰარის განცხადებით, ასეთი ნაბიჯის გადადგმა მეგანს „დაუსრულებელმა პროპაგანდამ“ აიძულა.

 

„მე დავკარგე დედა, ახლა კი ვუყურებ, როგორ ხდება ჩემი ცოლი იმავე ძალების მსხვერპლი“, - განაცხადა პრინცმა ჰარიმ.

 

ჰერცოგინიას ადვოკატები ირწმუნებიან, რომ „Mail on Sunday“-ს სტატიები არ შეესაბამება სიმართლეს და მეგან მარკლის პიროვნულ ღირსებას შეურაცხყოფენ.

 

თებერვალში გაზეთმა გამოაქვეყნა ხელნაწერი წერილი, რომელიც მეგანმა მამას ჰარისთან ქორწინების შემდეგ მისწერა.

 

ჰერცოგინიას ადვოკატებმა საჩივარი ლონდონის უმაღლეს სასამართლოში შეიტანეს გაზეთისა და იმ მედიაკომპანიის წინააღმდეგ, რომელსაც ეს გამოცემა ეკუთვნის. ისინი გამოცემას პირადი ინფორმაციის უკანონო გამოყენებაში, საავტორო უფლებების  და პერსონალური ინფორმაციის დაცვის კანონის დარღვევაში ადანაშაულებენ.

 

„Mail on Sunday“-ს წარმომადგენლის განცხადებით, გაზეთი თავის სტატიას სტანდარტების შესაბამისად მიიჩნევს და სასამართლოში თავის დაცვას აპირებს.

 

საჩივრის შეტანასთან დაკავშირებით პრინცი ჰარის განცხადება სასექსის ჰერცოგისა და ჰერცოგინიას ოფიციალურ საიტზე გამოქვეყნდა. როგორც განცხადებაში პრინცი ჰარი აღნიშნავს, მას და მის მეუღლეს სწამთ პრესის თავისუფლების და მას „დემოკრატიის ქვაკუთხედად“ მიიჩნევენ.

 

„დაუნდობელმა კამპანიამ ძალა მოიკრიბა უკანასკნელი წლის განმავლობაში, მისი ორსულობისა და ახალდაბადებულ შვილზე ზრუნვის დროს“, - აღნიშნა პრინცმა ჰარიმ.

 

პრინცმა ჰარიმ დედა, უელსის პრინცესა დიანაც გაიხსენა და აღნიშნა, რომ მისი ყველაზე დიდი შიშია - რომ ისტორია მეორდება.

 

 

 

big_banner
არქივი