„ჩემი აზრით, ტექნოლოგიების მეშვეობით შესაძლებელია საქართველოს შესახებ უამრავ ადამიანს გააგებინოთ და აქ ჩამოსვლა მოანდომოთ, რადგან თქვენ ნამდვილად ულამაზესი ქვეყანა გაქვთ“, - განაცხადა მასპინძლობისა და ტურიზმის ინდუსტრიის მსოფლიო ფორუმის „Welcome Challenge“-ის საპატიო სტუმარმა, „Microsoft“-ის ყოფილმა აღმასრულებელმა ვიცე-პრეზიდენტმა და „Steller“-ის პრეზიდენტმა რიჩარდ მაკანიფმა.

„ერთ-ერთი ყველაზე მნიშვნელოვანი, რაც აქ ჩამოსვლისთანავე შევნიშნე, არის ის, რომ ინტერნეტი ხელმისაწვდომია ყველგან.  რა თქმა უნდა, ეს მცირე ინოვაციაა, თუმცა უაღრესად მნიშვნელოვანი, ვინაიდან აქ ჩამოსული ტურისტები მუდმივად რჩებიან კავშირზე, მათ შეუძლიათ დაუკავშირდნენ ოჯახს და ონლაინ გაუზიარონ შთაბეჭდილებები უამრავ ადამიანს ქვეყნის ნებისმიერ კუთხეში ყოფნისას. ეს არის მაგალითი, თუ როგორ შეილება საინფორმაციო ტექნოლოგიებმა ხელი შეუწყოს ტურიზმის სექტორის განვითარებას“, - განაცხადა რიჩარდ მაკანიფმა.

„ამ ვიზიტამდე ბევრი რამ არ ვიცოდი საქართველოსა და საქართველოს ტურისტულ სექტორზე და ყველაფერს ადგილზე ვეცნობი. მე შევქმენი Stellar-ი, რომელიც საშუალებას იძლევა, საკუთარი გამოცდილება მსოფლიოს ნებისმიერ წერტილში მყოფ ადამიანებს გაუზიარო. სწორედ ამ აპლიკაციის მეშვეობით შევიტყვე საქართველოზე უამრავი ლამაზი ამბავი,” - განაცხადა „Microsoft“-ის ყოფილმა აღმასრულებელმა ვიცე-პრეზიდენტმა და „Steller“-ის პრეზიდენტმა.

მასპინძლობისა და ტურიზმის ინდუსტრიის მსოფლიო ფორუმი „Welcome Challenge“ საქართველოს ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის და თბილისის მერიის მხარდაჭერით პროექტ „Check in Georgia“-ის ფარგლებში 23 – 26 ოქტომბერს ტარდება. ფორუმზე სტუმართმასპინძლობის სფეროში მსოფლიოს საუკეთესო 20-ზე მეტი სტარტაპი იქნება წარმოდგენილი. სტარტაპების შეჯიბრში მონაწილეობენ სტარტაპები მსოფლიოს ყველა კონტინენტიდან. ღონისძიების მიზანია ინოვაციებით გამორჩეული სტარტაპებისთვის შეიქმნას საერთაშორისო ფორუმი, სადაც მასშტაბური პროექტები გამოვლინდება.