logo_geo
ცემენტის ფარული შემოწმების შედეგად, 29 ნიმუშიდან 14-მა ტესტირება ვერ გაიარა, აქედან 7-მა კი კრიტიკულად დაბალი შედეგი აჩვენა
- +

19 თებერვალი. 2019. 13:09

 

 

„საქართველოს ცემენტის ასოციაციის“ მიერ ჩატარებული მეექვსე ფარული ტესტირების შედეგების მიხედვით, ადგილობრივად წარმოებული შეფუთული ცემენტის 29 სახეობიდან, მხოლოდ 15 პროდუქტმა, ანუ 52%-მა დააკმაყოფილა ევროპული EN197-1 სტანდარტი, აქედან ხუთი „საქართველოს ცემენტის ასოციაციის“ წევრთა პროდუქციაა.

 

2019 წლის იანვარში შემოწმებული 29 ნიმუშიდან, 14-მა ვერ გადალახა ბარიერი, მათ შორის შვიდმა კი შეფუთვაზე დატანილ მაჩვენებელზე კრიტიკულად დაბალი შედეგი აჩვენა.

 

„აღსანიშნავია, რომ შედეგები გაუმჯობესდა 2018 წლის ნოემბრის ტესტირების შემდეგ, როცა 36 ნიმუშიდან მხოლოდ 13-მა გადალახა სტანდარტით გათვალისწინებული ბარიერი (36%). საქართველოს ცემენტის ასოციაციის ფარული ტესტირება პოზიტიურ ეფექტს ქმნის საქართველოს ცემენტის ბაზარზე, რისი დასტურიცაა 2019 წლის იანვრის ფარული ტესტირების რეკორდული მაჩვენებელი. შემოწმებული ცემენტის სახეობების 52 %-მა დააკმაყოფილა ევროპული სტანდარტი EN197-1. ცემენტის მწარმოებელი კომპანიების გარკვეულმა ნაწილმა ეტაპობრივად გააუმჯობესა მათი პროდუქციის ხარისხი, ხოლო დანარჩენმა კომპანიებმა პოზიტიური შედეგები პირველად აჩვენეს.

 

იმ კომპანიებს, რომლებმაც გარკვეული დროის მანძილზე დააკმაყოფილეს ევროპული სტანდარტით გათვალისწინებული მოთხოვნები, შესაძლებლობა აქვთ, გახდნენ საქართველოს ცემენტის ასოციაციის წევრები“, - წერია „საქართველოს ცემენტის ასოციაციის“  მიერ გავრცელებულ განცხადებაში.

 

2018 წლის ნოემბერში, „საქართველოს ცემენტის ასოციაციის“ მიერ პირველად მოხდა იმპორტირებული შეფუთული ცემენტის ხარისხის შემოწმება. შეფუთვაზე მითითებული სტანდარტის მოთხოვნა შვიდი იმპორტირებული ნიმუშიდან მხოლოდ სამმა დააკმაყოფილა.

 

შეგახსენებთ, რომ 2019 წლის 15 იანვრიდან ეკონომიკის სამინისტროს ტექნიკური და სამშენებლო ზედამხედველობის სააგენტოს მიერ, ახალი ტექნიკური რეგლამენტი ამოქმედდა. „საქართველოს ცემენტის ასოციაცია“ იმედოვნებს, რომ სააგენტო იქნება აქტიური და შეურიგებელი უხარისხო პროდუქციასთან ბრძოლის საკითხში.

 

„ცნობისათვის, 2017 წლიდან „საქართველოს ცემენტის ასოციაციის“ ინიციატივით საქართველოს ცემენტის ღია ბაზარზე ხელმისაწვდომი შეფუთული ცემენტის 6 ფარული ტესტირება ჩატარდა. 214 შემოწმებული შეფუთული ცემენტიდან, მხოლოდ 35% აკმაყოფილებს სტანდარტს EN197-1, დანარჩენი საგანგაშო 65%-მა ვერ გადალახა საჭირო ბარიერი. „საქართველოს ცემენტის ასოციაციის“ მიზანია ადგილობრივი ცემენტის მწარმოებლების ხელშეწყობა, რათა აწარმოონ მაღალი ხარისხის პროდუქცია და ამ მხრივ მაქსიმალური გამჭვირვალობის შექმნა ქართველი მომხმარებლისთვის“, - წერია „საქართველოს ცემენტის ასოციაციის“ განცხადებაში.

 

 

big_banner
არქივი