1929 წლის 12 აპრილს სოფელ არგვეთში დაიბადა გამოჩენილი ქართველი პოეტი, რუსთაველის პრემიის ლაურეატი - მუხრან მაჭავარიანი, რომელსაც დღეს 90 წელი შეუსრულდებოდა.

მუხრან მაჭავარიანის ლექსები სანიმუშოა თანამედროვე ქართული პოეზიისთვის და თარგმნილია რუსულ, ინგლისურ, გერმანულ, ფრანგულ და სხვა ენებზე.

მუხრან მაჭავარიანის ერთ-ერთი საუკეთესო კრებული „სიჩუმე უშენოდ“ ევგენი ევტუშენკომ თარგმნა რუსულ ენაზე.

დედა

როს „არას“ ნაცვლად - ამბობდი „ალას“,

როცა შენს ხმაში აპრილი ჟღერდა;

ხსოვნაში ტკბილად ჩარჩენილ „ნანას“ -

ვინ გიმღეროდა?!

- მშობელი დედა.

ეზოში როცა იტკენდი რამეს, -

ვინ გაჩნდებოდა იმ წუთში შენთან?!

შენი გულისთვის უძილო ღამეს

ვინ ათენებდა?!

- მშობელი დედა.

ახლა, - ხელში რომ გიჭირავს წიგნი, -

შენს სიცოცხლეში იმედს ვინ ჰხედავს?!

შენს მომავალზე დღედაღამ ფიქრით

ვინ ვერ ისვენებს?!

- მშობელი დედა.

ამ ქვეყანაზე შენი სიკარგე

ვის უხარია ყველაზე მეტად?!

ყველაზე უფრო, - თუკი ივარგებ, -

ვინ იამაყებს?!

- მშობელი დედა!