თელავში, აღმაშენებლის გამზირზე მოძრავი ორი ავტომობილი ერთმანეთს შეეჯახა.

თვითმხილველთა ინფორმაციით, „ოპელის“ მარკის ავტომობილი მაღალი სიჩქარით მოძრაობდა, მოსახვევში მძღოლმა საჭე ვერ დაიმორჩილა და გზის საპირისპირო მხარეს მოძრავ „ჯიპის“ მარკის ავტომობილს  შეეჯახა. შეჯახების შედეგად, „ოპელში“ მსხდომი სამი მგზავრიდან, ორს თელავის რეფერალურ საავადმყოფოში გადაყვანა დასჭირდა.

მორიგე ექიმის, ნინო ჩიტაძის განცხადებით, დაშავებული 17 და 23 წლის ახალგაზრდა მამაკაცების ჯანმრთელობის მდგომარეობა სტაბილურია. მათ სამედიცინო გამოკვლევები უტარდებათ.

საქართველოს შინაგან საქმეთა სამინისტროს ინფორმაციით, მომხდარზე გამოძიება სისხლის სამართლის კოდექსის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.