logo_geo
შაბათის შუადღის ოთხივე წამყვანმა „რუსთავი 2“ დატოვა
- +

22 აგვისტო. 2019. 21:06

 

 

შაბათის შუადღის ოთხივე წამყვანმა, ნესტან ნენე კვინიკაძემ, ქეთი დევდარიანმა, ლაშა ბუღაძემ და დათო ტურაშვილმა, „რუსთავი 2“ დატოვა. ამის შესახებ გადაცემის განცხადებაშია აღნიშნული.

 

მათი თქმით, იმ მედიარეალობის გათვალისწინებით, რომელიც საქართველოსთვის სამწუხარო რეალობად იქცა, „ლიტერატურული შაბათის“ წამყვანები შეუძლებლად მიიჩნევენ დარჩნენ ტელევიზიაში, სადაც, მათივე თქმით, აღარ იარსებებს ქართული სახელმწიფოსა და დემოკრატიისთვის სასიცოცხლოდ მნიშვნელოვანი, მოქმედი ხელისუფლებისთვის კი მიუღებელი კრიტიკული სიტყვა.

 

„სამწუხაროდ, საქართველოში უკვე მერამდენე ხელისუფლება იმეორებს წინამორბედის შეცდომებს და არც ეს ხელისუფლებაა გამონაკლისი ამ მხრივ და მეტიც — ეჭვი გვაქვს, რომ ეს მმართველობა არა მხოლოდ დემოკრატიასა და სიტყვის თავისუფლებას, არამედ საქართველოს ევროპულ, ისტორიულ არჩევანს უქმნის საფრთხეს და რაც მთავარია, საფრთხეს უქმნის საქართველოს დამოუკიდებლობასა და ქართულ სახელმწიფოებრიობას“, - ნათქვამია განცხადებაში.

 

წამყვანების განცხადებით, იმ ტელეკომპანიასთან, რომელიც ხელისუფლების ასეთი კურსისა და პოლიტიკის გამტარებელი იქნება, ისინი ვერ გააგრძელებენ თანამშრომლობას.

 

„ჩვენ ისევ იმ ღირებულებების ერთგულები ვიქნებით, რასაც ლიტერატურა ყოველთვის გვკარნახობს და რისთვისაც ეს გადაცემა შეიქმნა და წლების განმავლობაში არსებობდა. თავისუფლების ალტერნატივა არ არსებობს და თავისუფლება არ იყიდება“, - აღნიშნავენ გადაცემის წამყვანები.

 

ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი, ნოდარ მელაძე. შვებულებიდან დაბრუნების შემდეგ კი გაათავისუფლებენ საზოგადოებრივი და პოლიტიკური ტოქ-შოუს მთავარ პროდიუსერს, გიორგი ლაფერაშვილს; პოლიტიკური გადაცემების წამყვანებს, გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს, ნანუკა ჟორჟოლიანს. ახალმა დირექტორმა, პაატა სალიამ მათი გათავისუფლების მიზეზად „ინტერესთა კონფლიქტი“ და „შიდა ომები“ დაასახელა.

 

ამ გადაწყვეტილების შემდეგ რუსთავი 2 პირდაპირ ეთერში დატოვეს კურიერის წამყვანებმა, დიანა ჯოჯუამ და მიშა სესიაშვილმა. გუშინ, 21 აგვისტოს ტელეკომპანია თითქმის სრული შემადგენლობით დატოვეს ჟურნალისტებმა. რუსთავი 2 დატოვა რამდენიმე პროდიუსერმა, ასევე, გადაცემა კვირის სხვა შუადღის ოთხივე წამყვანმა.

 

 

 

big_banner
არქივი