„შეწყალებაზე პასუხისმგებლობა ეკისრება პრეზიდენტ სალომე ზურაბიშვილს“, – ამის შესახებ დავით ოთხმეზურის მამამ, გიორგი ოთხმეზურმა პროკურატურის დატოვების შემდეგ განაცხადა.

როგორც ოთხმეზურმა აღნიშნა, გამოკითხვისას თქვა, რომ მისი შვილის მკვლელობაში დამნაშავეა პრეზიდენტის მიერ შეწყალებული ბეჟანიძე, რის შესახებაც მასალები პროკურატურაშია.

„პასუხისმგებლობა ეკისრება სალომე ზურაბიშვილს. არ მაინტერესებს, ვისი გადაწყვეტილება იყო, ვინ ურჩია, ვინ ფული აიღო, ნაცნობობით გაკეთდა, სიყვარულით, თუ მტრობით. ამას არ აქვს მნიშვნელობა ჩემთვის. კითხვები სალომე ზურაბიშვილსა და დიმიტრი გაბუნიას არ შეხებია, მათი გვარები არც უხსენებიათ. ისიც მკითხეს, დამიკავშირდა თუ არა ვინმე პრეზიდენტისგან, მე ვუთხარი, რომ ჰქონდათ კომუნიკაციის მცდელობა, თუმცა მე უარი ვუთხარი“, – აღნიშნა ოთხმეზურმა.

საქართველოს პრეზიდენტმა, სალომე ზურაბიშვილმა 28 აგვისტოს 34 მსჯავრდებული შეიწყალა, რომელთა შორის იყვნენ მკვლელობისთვის მსჯავრდებული პირები. ფაქტზე პროკურატურა გამოძიებას აწარმოებს.