logo_geo
სალომე ზურაბიშვილი: ქუთაისის საერთაშორისო უნივერსიტეტის გახსნა ისეთივე მოვლენაა, როგორც 1918 წელს სახელმწიფო უნივერსიტეტის გახსნა იყო
- +

21 ოქტომბერი. 2020. 15:04

 

 

„ქუთაისის საერთაშორისო უნივერსიტეტის გახსნა ისეთივე მოვლენაა, როგორც თავის დროზე, 1918 წელს საქართველოს სახელმწიფო უნივერსიტეტის გახსნა იყო. მაშინ დაიბადა დამოუკიდებელი საქართველო. დღეს და აქ იბადება ახალი საქართველო“, – ამის შესახებ საქართველოს პრეზიდენტმა, სალომე ზურაბიშვილმა ქუთაისის საერთაშორისო უნივერსიტეტის გახსნაზე სიტყვით გამოსვლისას განაცხადა.

 

მან ივანიშვილების ოჯახს გაწეული ქველმოქმედებისთვის მადლობა გადაუხადა.

 

„საქართველო ხდება ქვეყანა, სადაც მსოფლიოს მეცნიერების უახლესი მიღწევების გათვალისწინებით, შესაძლებელი იქნება, ახალგაზრდამ მიიღოს უმაღლესი დონის განათლება ზუსტ და ტექნიკურ მეცნიერებებში, რომელიც მას მისცემს შესაძლებლობას, მსოფლიო სამეცნიერო საზოგადოების და მისი ავანგარდის სრულფასოვანი წევრი იყოს.

 

პანდემიისა და გლობალური კრიზისის დროს ახალი საერთაშორისო უნივერსიტეტის გახსნა არ არის მარტივი საქმე. ეს სამაგალითო საქმეა. ამას სჭირდება გამბედაობა. ასეთ ნაბიჯს სჭირდება რწმენა მომავლისა, ჩვენი ახალგაზრდების, ჩვენი ქვეყნის პერსპექტივის და ხვალინდელი დღისა. ეს იმ გამძლეობის და გამბედაობის გაგრძელებაა, რომელმაც მოგვიყვანა დღემდე.

 

შემთხვევით არ არის, რომ ეს ხდება ქუთაისში. ქუთაისი არა მხოლოდ კოლხეთის დედაქალაქი, არამედ საქართველოს ჭეშმარიტი ინტელექტუალური ცენტრია; ქუთაისი – ეს არის გელათის აკადემია. ქუთაისმა ქართველი ერის განათლების მისიას ყველა ეპოქაში წარმატებით გაართვა თავი. გასულ საუკუნეში ქუთაისში თავმოყრილი ინტელექტუალური ძალების თბილისში გადასვლამ თბილისის ივანე ჯავახიშვილის სახელობის სახელმწიფო უნივერსიტეტის დაარსება განაპირობა.

 

ქვეყნის ისტორიაში არის სხვადასხვა ეტაპი, როცა განსაკუთრებული პასუხისმგებლობა გადადის მეცენატებსა და მათ პრიორიტეტებზე. ჩვენ არაერთი მაგალითი გვაქვს ჩვენს ისტორიაში მსგავსი მეცენატობისა, როცა ერთი ადამიანის ხედვამ განაპირობა ათწლეულობით საქართველოს წარმატება მთელ რიგ დარგებში. ჩვენი კულტურის და განათლების განვითარება დიდწილად მათზე იდგა. დღეს სწორედ მსგავსი ფაქტის თანაზიარნი ვართ. მინდა, მადლობა მოვახსენო ივანიშვილების ოჯახს გაწეული ქველმოქმედებისთვის, ფონდ „ქართუსა“ და ყველა იმ ადამიანს, ვინც მონაწილეობა მიიღო ამ საშვილიშვილო საქმეში. ვულოცავ ქუთაისსა და სრულიად საქართველოს ამ უდიდეს შენაძენს. დაე, ეს უნივერსიტეტი ყოფილიყოს ახალი გელათი ქართული კულტურისა და მეცნიერებისათვის“, – განაცხადა სალომე ზურაბიშვილმა.

 

 

big_banner
არქივი