logo_geo
თენგიზ ცერცვაძე: ჩვენი ქვეყანა მზად უნდა იყოს იმისთვის, რომ ვაქცინის მოწოდების შემთხვევაში, შიდა მიზეზებით არ მოხდეს ვაქცინაციის შეფერხება
- +

25 იანვარი. 2021. 21:40

 

 

თბილისის ინფექციური საავადმყოფოს დირექტორის, თენგიზ ცერცვაძის განცხადებით, ბოლომდე საქართველოზე არ არის დამოკიდებული, თუ როდის და ვაქცინის რამდენ დოზას მიიღებს, თუმცა ქვეყანა მაქსიმალურად უნდა იყოს მზად იმისთვის, რომ შიდა – ორგანიზაციული ან ლოჯისტიკური მიზეზებით არ მოხდეს ვაქცინაციის შეფერხება.

 

„ის, რომ საქართველო ძალიან აქტიურად არის ამ პროცესში ჩართული და ძალისხმევას არ იშურებს არც ერთ დონეზე – არც ექიმების, არც სამთავრობო, ჯანდაცვის სამინისტროს, არც პარლამენტის დონეზე, მისასალმებელია და მიუთითებს იმ პასუხისმგებლობაზე, იმ მნიშვნელობაზე, რასაც ქვეყანა ვაქცინას ანიჭებს.

 

რა თქმა უნდა, ერთია ვაქცინის მოწოდება, როდის, როგორ, რამდენს მოგვაწოდებენ, ეს არ არის მთლად ჩვენს ქვეყანაზე დამოკიდებული, ეს დამოკიდებულია მწარმოებლებზე, დღესდღეობით ვაქცინის თუ რა რაოდენობა არის ხელმისაწვდომი მსოფლიოში, მეორეა ჩვენი ქვეყნის მზადყოფნა. აი, აქ კითხვის მიშნები არ უნდა დარჩეს, ჩვენი ქვეყანა უნდა იყოს მაქსიმალურად მზად იმისთვის, რომ ვაქცინის მოწოდების შემთხვევაში, შიდა მიზეზებით, რამე ორგანიზაციული ან ლოჯისტიკური მიზეზებით არ მოხდეს ვაქცინაციის შეფერხება და შეყოვნება. ამ კუთხით საკოორდინაციო საბჭოს, სამთავრობო და პარლამენტის გადაწყვეტილებაც მნიშვნელოვანია“, – განაცხადა თენგიზ ცერცვაძემ.

 

მისი შეფასებით,  ვაქცინაციის დანერგვის გეგმა, რომელიც უკვე დამტკიცებულია, არის ოპტიმალური და მაქსიმალურად გათვლილი ადამიანის ინტერესებზე.

 

„დამტკიცებულია ძალიან კარგი გეგმა, მე არ ვარ უშუალოდ საბჭოს წევრი, ვიცნობ ამ გეგმას. მიმაჩნია, რომ ეს გეგმა არის ოპტიმალური და მაქსიმალურად გათვლილი ქვეყნის და ადამიანის ინტერესებზე“, – აღნიშნა თენგიზ ცერცვაძემ.

 

 

წყარო : wyaro
big_banner
არქივი