NATO-ს შესყიდვებისა და მომსახურების სააგენტომ (NSPA) NATO-საქართველოს წვრთნისა და შეფასების ერთობლივ ცენტრს (JTEC) 5 ერთეული „რენოს“ მარკის საშუალო გამავლობის ავტომანქანა გადასცა. სატრანსპორტო საშუალებების გადაცემა ცენტრის შესაძლებლობების განვითარებას, მობილურობის გაზრდასა და ლოჯისტიკური კომპონენტის გაუმჯობესებას ისახავს მიზნად.

სატრანსპორტო საშუალებების გადაცემის ცერემონიას საქართველოს თავდაცვის მინისტრის მოადგილე ზურაბ აზარაშვილი, თავდაცვის ძალების მეთაურის მოადგილე, გენერალ-მაიორი ზაზა ჩხაიძე, NATO-ს სამეკავშირეო ოფისის ხელმძღვანელის მოადგილე პირიტ პიკერი და NATO-ს შესყიდვებისა და მომსახურების სააგენტოს წარმომადგენლები დაესწრნენ.

NATO-ს მხარემ NATO-საქართველოს წვრთნისა და შეფასების ერთობლივი ცენტრისათვის (JTEC) სხვადასხვა ტიპის სატრანსპორტო საშუალებები NATO-ს შესყიდვებისა და მომსახურების სააგენტოსა (NSPA) და საქართველოს თავდაცვის სამინისტროს შორის 2017 წელს გაფორმებული გრანტის ხელშეკრულების საფუძველზე შეიძინა, რომლის საერთო ღირებულება 1,2 მლნ ევროს შეადგენს.

JTEC-ს ჯამში 20 სატრანსპორტო საშუალება გადაეცა, რის შედეგადაც მნიშვნელოვნად გაუმჯობესდა JTEC-ის უზრუნველყოფასთან და ტრანსპორტირებასთან დაკავშირებული საკითხები. სატრანსპორტო საშუალებები თითოეულ ჯარისკაცს მოემსახურება და გაზრდის JTEC-ის ეფექტურობას და შესაძლებლობებს. პროექტის განხორციელებაში აქტიურად იყო ჩართული NATO-ს მრჩეველთა ჯგუფი JTEC-ში.