logo_geo
დავით ნარმანია: ბოლო 50-60 წლის განმავლობაში პეკინის ქუჩის ასეთი ფუნდამენტური რეაბილიტაცია არ გაკეთებულა!
- +

16 ივნისი. 2017. 03:53



თბილისის მერმა დავით ნარმანიამ დედაქალაქის მთავრობის სხდომაზე განაცხადა, რომ პეკინის ქუჩის რეაბილიტაცია არის ძალიან მნიშვნელოვანი და ისტორიული პროექტი - ბოლო 50-60 წლის განმავლობაში.


მისი თქმით, პეკინის ქუჩის ასეთი ფუნდამენტური რეაბილიტაცია არ გაკეთებულა, როგორიც 2017 წელს დაიგეგმა.


„საუბარია იმაზე, რომ მთლიანად პეკინის გამზირზე გამოიცვლება მიწისქვეშა კომუნიკაციები, როგორიცაა წყალი, გაზი, „თელასის" კაბელები, ინტერნეტი და სხვა. ამის შემდეგ აღდგება გზის საფარი, მოეწყობა ტროტუარები და მივიღებთ ძალიან მნიშვნელოვან პროექტს. პეკინის გამზირი ერთ-ერთი ყველაზე ინტენსიურ მოძრაობიანი ქუჩაა, სადაც მუდმივად დანგრეული გზის საფარი გადაადგილებისთვის მნიშვნელოვან დისკომფორტს იწვევს. შესაბამისად არის ხმაური, რომელიც აწუხებს მოსახლეობას. ამიტომ ჩვენ მივიღეთ მნიშვნელოვანი გადაწყვეტილება, შესაბამისი რესურსები მობილიზებულია და 16 ივნისიდან ვიწყებთ რეაბილიტაციას", - განაცხადა ნარმანიამ.


მისივე თქმით, რეაბილიტაციის პროცესში სატრანსპორტო გადაადგილების მარშრუტებიც იცვლება, რასთან დაკავშირებითაც მოსახლეობა ინფორმირებული იქნება.


„მესმის, რომ ასეთი ცვლილებები გადაადგილებასთან დაკავშირებით გარკვეულ დისკომფორტს იწვევს, თუმცა ეს არაფერია იმ დიდ სიკეთესთან მიმართებაში, რომელსაც ჩვენ ამ პროექტის განხორციელებით მივიღებთ. ზაფხულის განმავლობაში იქნება ინტენსიური 24-საათიანი სამუშაო რეჟიმი, რათა სექტემბრის დასაწყისში, ვიდრე მოსახლეობა ზაფხულის არდადეგების შემდეგ დედაქალაქში დაბრუნდება, აღნიშნული პროექტი იყოს დასრულებული", - განაცხადა დავით ნარმანიამ.


 

 

 

big_banner
არქივი