logo_geo
როგორ მოილხინა ქართველ მსახიობებთან ერთად რობერტ დე ნირომ – რობერტ სტურუა სახალისო ისტორიას იხსენებს
- +

18 მარტი. 2018. 16:50

 

რეჟისორი რობერტ სტურუა მსახიობ რობერტ დე ნიროსთან შეხვედრას იხსენებს და სოციალურ ქსელში შემდეგი სახის პოსტს აქვეყნებს:

 

„დღეს რეპეტიცია არ მაქვს, თანაც გრიპი შემეყარა და ამიტომ ვზივარ და რაღაცებს ვიხსენებ - ალბათ სიბერის ბრალია, მემუარების სენმაც დამჯაბნა. უცხოეთში მიმავალი დასი ზის ჩემს დიდ ნომერში სასტუმრო „მოსკოვში"... ისევ ვქეიფობთ, ისევ ლერია თამადა. კარები ღია გვაქვს - ძალიან ცხელა და იმიტომ... უეცრად, ლერი გაოგნებული ჩურჩულებს: „რობერტ დე ნირო, რობერტ დე ნიროოო!" გავხედეთ და თვალებს არ ვუჯერებთ - რობერტ დე ნირო კარებში დგას და ჩვენს სიმღერას უსმენს... წამოვხტით, მოვიპატიჟეთ, ოცი წუთი ჩვენთან მოილხინა, ავუხსენით ვინ ვართ, რანი ვართ - გაუხარდა, მაშინ სსრკ-ში მისი ფილმები, „ირემზე ნადირობის" შემდეგ, აკრძალული გახლდათ... გაუხარდა, რადგან მოსკოვის ფესტივალზე არავინ იცოდა ვინ არი ეს დე ნირო... და, თუ არ ვცდები, კმაყოფილი წავიდა. ჩვენც მეორე დღეს საფრანგეთში გავემგზავრეთ...

 

ერთ კვირაში ვბრუნდებით ავინიონიდან, ისევ იმ ნომერში, იმპროვიზებულ სუფრასთან, ისევ ლერის თამადობით, ისევ მრავალჟამიერს ვმღერით... და... ისევ, კარებში გაოგნებული რობერტ დე ნირო დგას. გათამამებული ლერი: ო, რობერტ, კარგ დროს მოგვისწარი, სწორედ ახლა შენს სადღეგრძელოს ვსვამდითო. კი მაგრამ გასტროლები?- გვეკითხება რობერტი. რად გვინდა გასტროლები, ქეიფი არ ჯობია? აქ ვართ და შენ გიცდიდითო... გაეცინა და შემოგვიერთდა... აპა", - წერს რობერტ სტურუა.

 



 

big_banner
არქივი