logo_geo
ინგა მამუჩიშვილი: მშობელზე ძალადობას ვაქცინაციის გამო, არავინ ახდენს!
- +

28 იანვარი. 2019. 13:10

 

პედიატრი ინგა მამუჩიშვილი სოციალურ ქსელში შემდეგი სახის პოსტს აქვეყნებს:

 

„კომენტარსაც კი ვერ ვაკეთებ. რატომ უხეთქავთ ერთმანეთს გულს?! ანევროზებთ?! გულგახეთქილმა დედიკომ მომწერა! ეს ხომ ინაქტივირებული (მკვდარი) ვაქცინაა, რეკომენდებული ჯანდაცვის მსოფლიო ორგანიზაციის მიერ! სეზონურად მთელი ცივილიზებული მსოფლიო იკეთებს!!! სპეციალურად შექმნილი საიტები ავრცელებენ ამ „ფეიქ ნიუსებს“!!! დამშვიდდით!!! არ არსებობს არცერთი ანალიზით გამყარებული სამეცნიერო შრომა, რომელშიც ამ სისულელეს წაიკითხავთ!!! ნეტავ, ერთი, სამი თვით მაინც გაითიშოს ინტერნეტი, რომ გადავრჩეთ. სრულად გთავაზობთ ამ შეშინებული დედიკოს ტექსტს:

 

„საღამო მშვიდობისა, ინგა ექიმო. ძალიან შემაშინეს დღეს, გრიპის აცრებთან დაკავშირებით. პირდაპირ ღვიძლზე მოქმედებს, ციროზს და ჰეპატიტებს იწვევსო. რომ ვუთხარი, 2 წელია ჩვენ ვიკეთებთ და ბავშვებსაც ვუკეთებ-მეთქი – უი, სასწრაფოდ გადაამოწმეთ ანალიზებიო. ისე მეშინია და გული ისე ცუდად მაქვს. მართალია ეგ რაღაცები? უნდა მეშინოდეს? გადავამოწმო? ინფლუვაკი გვაქვს გაკეთებული, შარშანაც და წელსაც“.

 

იქნებ მიპასუხოთ, ოქტომბერ-ნოემბერში ვინც არ დამიჯერა და არ აიცრა, რამდენს შეხვდა, იცით, რთული ფორმით? მშობელზე ძალადობას ვაქცინაციის გამო, არავინ არ ახდენს! ჩვენი მოვალეობაა, გავაფრთხილოთ ისინი, რომ შესაძლებელია გვქონდეს ზამთრის თვეებში გრიპის A სეროტიპის H1N1 ქვეტიპის ეპიდემია, რომელიც ძალიან კონტაგიოზურია და იძლევა გართულებებს! ვაქცინაციაც კი არ არის აბსოლუტური დაცვა! თუმცა, თუ მაინც შეგხვდათ, გართულებების გარეშე, მარტივად გადაიტანთ!“ – წერს ინგა მამუჩიშვილი.

 

 

 

big_banner
არქივი