ფილოლოგიის დოქტორი გია მურღულია კომპოზიტორ გია ყანჩელის გარდაცვალების შესახებ სოციალურ ქსელში შემდეგი სახის პოსტს აქვეყნებს:
„ღმერთი ხანდახან თავისი მიუწვდომელი და იდუმალი წიაღიდან უცნაურ სინათლეს გამოაჩენს, რომ ადამიანი ჩვეულებრივზე მეტად დააფიქროს ცხოვრების საზრისზე. ეს სინათლე სიკვდილით მოდის - რა დამთრგუნველი და რა დიადია ის!
„ღმერთო, ვინ მიჰსწვდეს შენგან ქმნილს, მისს ფერ უთვალავს შვენებას, სიბნელეს აქრობ ნათელით, სიკვდილით ჰბადავ ცხოვრებას“. (გრიგოლ ორბელიანი)
„ღმერთმა გიშველოს, სიკვდილო, სიცოცხლე შვენობს შენითა“. (ვაჟა-ფშაველა)
სიკვდილი ნათელს ჰფენს ცხოვრებას - საბოლოო სიცხადეს ანიჭებს მას.
ჩვეულებრივ, ეს ასეა.
თუმცა, ძალიან იშვიათად სხვაგვარადაც ხდება - ზოგჯერ ადამიანი ანიჭებს აზრს სიცოცხლესაც და სიკვდილსაც. საოცარი ის არის, რომ არც პირველი ეწინააღმდეგება და არც მეორე.
დღეს საქართველოს ერთი ასეთი კაცი აღარ ჰყავს - კაცი, რომელმაც მუსიკას დუმილის სიმაღლე მიანიჭა.
გია ყანჩელი ქმნიდა სამყაროს, რომელშიც ადამიანსა და დროს ემეგობრებოდა.
ახლა ის მარადისობის მეგობარია“,- წერს მურღულია.