„ქართული იდეის" ლიდერი ლევან ჩაჩუა სოციალურ ქსელში სტატუსს აქვეყნებს:
„მე ქართველი ვარ!
მე ქართველი ვარ!
მე ქართველი ვარ! - ეს ძარღვიანი სიტყვები უნდა იქცეს ჩვენი სულიერების, ცნობიერებისა და მიწა-წყლის დაცვისათვის სამართლიანი ბრძოლის დევიზად!
მხოლოდ ეთნიკური ქართველის მოაზრება როდი შეიძლება ამ სიტყვების ქვეშ?!
ვინ იყვნენ უფრო დიდი ქართველები ვიდრე: - წმ. მირიან მეფე (სპარსი); წმ. ნანა დედოფალი (ბერძენი); წმ. აბო თბილელი (არაბი); წმ. შუშანიკ დედოფალი (სომეხი); ბაგრატოვანი წმ. მეფე-დედოფლები (ტომით ებრაელნი)... რომელი ეთნიკური ქართველი გაბედავს და იტყვის, მათზე დიდი ქართველი ვარო?!
ეს გახლავთ - „ქართული იდეა"!
იდეა, რომლისთვისაც ორგანულია ღვთისა და მოყვასის სიყვარული და უცხოა ეთნიკური „ნაციონალიზმი"...
და კიდევ ერთხელ შევძახებ ომახიანად:
მე ქართველი ვარ!!!" - წერს ლევან ჩაჩუა.
ჩაჩუას აღნიშნულ სტატუსს საზოგადოების ნაწილი დაეთანხმა, ნაწილში კი იმ ფაქტმა, რომ მან ქართველი მეფეები ეთნიკურად არაქართველებად მოიხსენია, გაღიზიანება გამოიწვია. ამ ფაქტს ლევან ჩიჩუა შემდეგი განცხადებით გამოეხმაურა:
„მე მეამაყება, რომ საქართველოს წმ. აშოტ კურაპალატის, წმ. ბაგრატ III-ის, წმ. დავით აღმაშენებლის, თამარის, ქეთევანის და მრავალი სხვა მსგავსი ღირსეული მეფე-დედოფლები ჰყავდა... იმის გამო, რომ ისინი ეთნიკური ქართველები არ იყვნენ, მე ღმერთმა დამიფაროს, რომ მათ დიდ ქართველობაში ეჭვი შევიტანო..." - წერს ჩაჩუა.