ჟურნალისტი იოსებ ჭუმბურიძე დიდი ქართველი პოეტის ანა კალანდაძის შესახებ სოციალურ ქსელში პოსტს აქვეყნებს:
„ქალბატონმა ლეილა კაჭარავამ მიამბო წლების წინათ:
რესტორან „ბერიკონში“(ახლა რომ დიდი კაზინოა) ანას მეგობრის (ქიცა ხერხეულიძის) შვილის თუ შვილიშვილის ქორწილია.
ანა, რა თქმა უნდა, ჩუმად, ფეხაკრეფით შემოვიდა და, თამხლებ პირებთან ერთად, ერთ-ერთ კუპეში (იქ კუპეები იყო) განმარტოვდა.
მისი შემოსვლა უმრავლესობას არც გაუგია.
***
და აი, შუა ქორწილში, თამადა (გივი სიხარულიძე) აცხადებს, რომ დარბაზში ანა კალანდაძე იმყოფება.
იცით, რა მოხდა?!
ჯერ მთელმა დარბაზმა ერთდროულად წარმოთქვა რაღაც შორისდებული - გაოცებისა და სიხარულის გამომხატველი და შემდეგ დაიწყო და რა დაიწყო?!
ანას ლექსების წარმოთქმა - აქედან და იქიდან. ერთი დაამთავრებდა, მეორე იწყებდა, მეორე დაამთავრებდა, იწყებდა მესამე და ასე დაუსრულებლად.
***
ანა კი ჩუმად იჯდა ერთ-ერთ კუპეში და არ იცოდა, სად წასულიყო...
ეს უკვე მე წარმოვიდგინე...“ - წერს იოსებ ჭუმბურიძე.