თბილისში ელექტრონული მუსიკისა და ციფრული ხელოვნების ფესტივალების სერია - DECODER დაფუძნდა, რომელიც თვეში ერთხელ სხვადასხვა ლოკაციაზე გაიმართება.
ფესტივალის მუსიკალური პროგრამა ელექტრონული მუსიკის სხვადასხვა მიმართულებებს მოიცავს და გამორჩეული საერთაშორისო და ადგილობრივი არტისტებისგან იქნება დაკომპლექტებული.
DECODER-ის პირველი სერია, 21 სექტემბერს, მულტიფუნქციურ საკონცერტო დარბაზ „SPACEHALL"-ში გაიმართება და ელექტრონული მუსიკის უმნიშვნელოვანეს ფიგურას - NICOLAS JAAR-ს უმასპინძლებს, რომლის შემოქმედებას პროფესიული მუსიკალური განათლებისა და მრავალფეროვანი გამოცდილების გამო განსაკუთრებული შინაარსი აქვს.
მისი სადებიუტო ალბომი „SPACE IS ONLY NOISE" 2011 წელს RESIDENT ADVISOR-ის, MIXMAG-ის და CRACK MAG-ის მიერ წლის საუკეთესო ალბომად დასახელდა, მომდევნო სამი წლის განმავლობაში საუკეთესო ცოცხალი შესრულების მქონე არტისტის ტიტული ჰქონდა.