logo_geo
„ერეკლე ბატონიშვილის სასახლის ძველი ვიტრაჟების „უმეთვალყურეოდ“ მიტოვება რეალობას არ შეესაბამება“
- +

12 მარტი. 2018. 17:16



კულტურული მემკვიდრეობის დაცვის ეროვნული სააგენტო სოციალურ ქსელში გავრცელებულ ინფორმაციას ეხმაურება, თითქოსდა ერეკლე ბატონიშვილის სასახლის ძველი ვიტრაჟები მიატოვეს.


მათი ცნობით, თელავის ისტორიის მუზეუმის ტერიტორიაზე ერეკლე ბატონიშვილის სასახლის ძველი ვიტრაჟების „უმეთვალყურეოდ" მიტოვების შესახებ გავრცელებული ცნობა რეალობას არ შეესაბამება და ის მხოლოდ საზოგადოების შეცდომაში შეყვანას ემსახურება.


„საქართველოს კულტურული მემკვიდრეობის დაცვის ეროვნული სააგენტოს მიერ ვითარების გადამოწმების შემდეგ დადგინდა, რომ თელავის ისტორიის მუზეუმის ტერიტორიაზე კომპლექსური რეაბილიტაციის პროცესის შედეგად, რომელიც საქართველოს მუნიციპალური განვითარების ფონდის მიერ განხორციელდა, ერეკლე ბატონიშვილის სასახლის ფასადებიდან ჩამოხსნილი ვიტრაჟები ნაგებობის სარდაფშია დასაწყობებული და მათ შემდგომი ფიზიკური დაზიანების რისკი არ ემუქრებათ. სააგენტოს სპეციალისტების შეფასებით, ფერადად შემინული ხის ვიტრაჟების უმეტესობა, რეაბილიტაციის პროცესის დაწყებამდეც მნიშვნელოვნად იყო ამორტიზებული და სარეაბილიტაციო ობიექტზე მათი შენარჩუნება მიზანშეუწონელი იყო. საექსპერტო შეფასებით, ვიტრაჟების დარჩენილ ნაწილს კი სრულად ჰქონდა დაკარგული ფიზიკური მდგრადობა. ამავდროულად,  გასათვალისწინებელია, რომ XX საუკუნის საბჭოურ წლებში ბატონიშვილის სასახლეზე ჩატარებული სარეაბილიტაციო პროექტის მსვლელობისას გამოცვლილი ვიტრაჟები კონსტრუქციულად არ შეესაბამებოდა ავთენტურ წყობას, რამდენადაც ისინი ერთშრიანი შემინვით იყო დამზადებული.

 

ახალი ვიტრაჟები კი სახელოვნებათმცოდნეო დასკვნების მიხედვითაა აწყობილი და ის პროექტში გათვალისწინებულ ცალკე კომპონენტად შეთანხმდა კულტურული მემკვიდრეობის დაცვის საბჭოსთან.

 

ერეკლე მეორის სასახლის რეაბილიტაცია, რეგიონული განვითარების პროექტის ფარგლებში, მსოფლიო ბანკისა და საქართველოს მთავრობის დაფინანსებით, საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდმა განახორციელა. პროექტის მიზანი ძეგლისთვის პირვანდელი იერსახის შენარჩუნება და კახეთის რეგიონში ტურიზმის ხელშეწყობა გახლდათ. მუნიციპალური განვითარების ფონდის ძალისხმევით, ბატონის სასახლის რესტავრაცია ავთენტურობის სრული დაცვით ჩატარდა. არსებული პროექტი კულტურული მემკვიდრეობის სააგენტოსთან შეთანხმებით მომზადდა. სასახლის ტერიტორიაზე დამონტაჟდა აივნების სვეტები, ჩატარდა კირით ლესვითი სამუშაოები. დერეფნები და დარბაზის იატაკები აგურითა და ქართული ქვით მოპირკეთდა. დამონტაჟდა ვიტრაჟები და გარე განათება. სასახლის რეაბილიტაცია 1 871 893 ლარი დაჯდა", - აღნიშნულია კულტურული მემკვიდრეობის დაცვის ეროვნული სააგენტოს მიერ გავრცელებულ ინფორმაციაში.



 

 

 

 

 

 

 

 


 




 

big_banner
არქივი