16 ნოემბრიდან 30 ნოემბრის ჩათვლით უკრაინაში ახალი ქართული კინოს XIV ფესტივალი გაიმართება.
სრულაიდ უკრაინის საზოგადოებრივი ორგანიზაცია „გეორგიას“ პრეზიდენტის, ბესიკ შამუგიას განცხადებით, წელს ქართველი რეჟისორების ფილმების ნახვას მაყურებელი უკრაინის ექვს ქალაქში – კიევში, ხარკოვში, სუმიში, ზაპოროჟიეში, ოდესაში, ლვოვსა და ჟიტომირში შეძლებს.
„ფესტივალის ფარგლებში ნაჩვენები იქნება ფილმები, რომელთაც ბოლო წლებში მრავალი პრესტიჟული საერთაშორისო ჯილდო აქვთ მიღებული. ერთ-ერთი მათგანი ზაზა ურუშაძის „აღსარება“ – ოსკარის ნომინაციის ლონგლისტშია შესული, როგორც „საუკეთესო უცხოენოვანი ფილმი“. თითოეული ფილმი ქართულ ენაზე, უკრაინული სუბტიტრებით იქნება წარმოდგენილი“, – აცხადებს შამუგია.
უკრაინის მასშტაბით სულ ნაჩვენები იქნება შვიდი ახალი ქართული ფილმი: „აღსარება“, „ნამე“, „ხიბულა“, „ექვთიმე“, „გრძელი ნათელი დღეები“, „სიმინდის კუნძული“ და „მოირა“.
კინოფესტივალის გახსნის საზეიმო ცერემონიალი 16 ნოემბერს კიევში გაიმართება.
ფესტივალის ორგანიზატორები არიან სრულიად უკრაინის საზოგადოებრივი გაერთიანება „გეორგია“ და უკრაინის ქართველთა ასოციაცია „იბერიელი“. მხარდამჭერები – უკრაინის კულტურის სამინისტრო და საქართველოს კინემატოგრაფიის ეროვნული ცენტრი.