logo_geo
კახა კალაძე ექიმებს შეხვდა და პროგრამული ხედვა გააცნო
- +

28 სექტემბერი. 2017. 18:36



„ქართული ოცნება - დემოკრატიული საქართველოს" თბილისის მერობის კანდიდატი კახა კალაძე, მხარდამჭერთა კლუბში, ექიმებს შეხვდა და ქალაქის განვითარების პროგრამული ხედვა წარუდგინა.


კახა კალაძემ მედიკოსებს ურბანული, სატრანსპორტო, ეკოლოგიური, ეკონომიკური, სოციალური და ჯანდაცვის, განათლებისა და კულტურის, ასევე, მართვის პოლიტიკები გააცნო. 


თბილისის მერობის კანდიდატმა შეხვედრაზე ყურადღება გაამახვილა ეკოლოგიის, სოციალური და ჯანდაცვის მიმართულებით დაგეგმილ ღონისძიებებზე და განაცხადა, რომ 4 წლის განმავლობაში, თბილისის მერია იზრუნებს, რომ ქალაქში ეკოლოგიური მდგომარეობა გაუმჯობესდეს და ადამიანების ჯანმრთელობა და საარსებო გარემო მეტად დაცული იყოს. 


„ჩვენ წარმოვადგინეთ მთლიანი პროგრამული ხედვა, მათ შორის, საუბარი იყო ჯანდაცვაზე და სოციალურ მიმართულებებზე. ეს, რა თქმა უნდა, ჩვენს საარჩევნო პროგრამაში ძირითადი  მიმართულებებია, რომელიც საკმაოდ აქტუალურია დღეს თბილისელებისთვის. დღეს ექიმებს გავაცანით სამომავლო გეგმები. ისინი არიან ადამიანები,  ვინც ყოველდღიურ რეჟიმში ზრუნავს ჩვენი, ჩვენი შვილების ჯანმრთელობაზე და ვფიქრობ, კმაყოფილები დარჩნენ. ამ პროექტების განხორციელება რამდენიმე წლის განმავლობაში გვაქვს დაგეგმილი.  საკმაოდ ამბიციური გეგმა გვაქვს და მჯერა, რომ თბილისელებთან ერთად ჩვენ მოვახერხებთ ამ პოლიტიკური მიზნების შესრულებას", - განაცხადა კახა კალაძემ.


შეხვედრას ჯანდაცვის სპეციალისტებთან და ექიმებთან ერთად, ჯანდაცვის მინისტრი დავით სერგეენკო და ჯანდაცვის საპარლამენტო კომიტეტის წევრები ესწრებოდნენ.


„თავიდან, როდესაც გავეცანი სოციალური ჯანდაცვის ნაწილს, მართალი გითხრათ,   სასიამოვნოდ გაკვირვებული დავრჩი, რადგან პრაქტიკულად სინქრონიზებულია ცენტრალური ხელისუფლებისა და ადგილობრივი მუნიციპალიტეტის მცდელობები, ძალისხმევა იმისათვის, რომ  მოქალაქეების ჯანმრთელობა და სოციალური მდგომარეობა გახდეს უკეთესი. მე მჯერა, რომ კახი კალაძე იქნება ძალიან კარგი მერი და გვექნება მეტი შესაძლებლობა, რომ მოქალაქეებს მეტი შვება მივცეთ", - განაცხადა დავით სერგეენკომ.


კახა კალაძის პროგრამულ ხედვაში წარმოდგენილი სოციალური და ჯანდაცვის მიმართულებები შეაფასეს სამედიცინო საზოგადოების წარმომადგენლებმაც.

 

„იმისთვის, რომ ჩვენ, ექიმებმა, მაქსიმალურად მაღალტექნოლოგიური სამედიცინო სერვისები, როგორც დიაგნოსტიკური,  ისე სამკურნალო, შევთავაზოთ ჩვენს პაციენტებს, უნდა განვითარდეს ეს სერვისები. ამისათვის კი გვჭირდება ძლიერი სახელმწიფო, ძლიერი თვითმმართველობები, ძლიერი მერი. რა თქმა უნდა, კახა კალაძე იქნება წარმატებული მერი. მას უწევს საკმაოდ რთული გზის გავლა და ჩვენი, თითოეული ექიმის ძირითადი  მიზანია მას ამ გზის გავლაში დავეხმაროთ და შევქმნათ მაქსიმალურად ჯანსაღი, ეკოლოგიურად სუფთა გარემო სიცოცხლით სავსე ქალაქში", - განაცხადა პედიატრმა თემურ მიქელაძემ.


ალერგიისა და იმუნოლოგიის ცენტრის დირექტორი მაია გოთუა აღნიშნავს, რომ მსოფლიოს ახალი გამოწვევის - ალერგიის ფონზე, განსაკუთრებული მნიშვნელობა ენიჭება ეკოლოგიური საკითხების მოგვარებას.


„ძალიან დიდი მნიშვნელობა აქვს ჩვენი ქალაქისთვის, რომ იყოს ჯანსაღი გარემო, იყოს ნატურალური პროდუქტი და რაც შეიძლება ალერგენებისგან და გენეტიკურად მოდიფიცირებული საკვებისგან თავისუფალი საშუალებები, რომელსაც მოიხმარს ადამიანი. ვინაიდან ალერგია გახდა მსოფლიო პრობლემა, განსაკუთრებული მნიშვნელობა აქვს ჩვენი ახალგაზრდებისთვის ეკოლოგიურ ჰარმონიას და ამიტომაც, მნიშვნელოვანია, იყოს გამწვანებული ქალაქი, ჯანსაღი, სუფთა ჰაერი ჩვენი მცხოვრებლებისთვის, მაგრამ, ამავე დროს, უნდა დაწესდეს ძალიან დიდი  კონტროლი საკვებ პროდუქტებზე, ჰაერზე, წყალზე და ყველაფერ იმასთან, რასთანაც ჩვენ ბავშვებს აქვთ ურთიერთობა. ამ მხრივ, იმედს გამოვთქვამ,  წარმოდგენილი ხედვა ძალიან სასარგებლო იქნება ჩვენი მოსახლეობისთვის", - განაცხადა მაია გოთუამ.


კახა კალაძე საარჩევნო კამპანიის ფარგლებში სხვადასხვა სოციალურ და პროფესიულ ჯგუფებთან შეხვედრებს აგრძელებს. თბილისის მერობის კანდიდატის განცხადებით, მნიშვნელოვანია, თბილისში მცხოვრებმა მოქალაქეებმა მაქსიმალურად დეტალური ინფორმაცია მიიღონ მომავალი 4 წლის განმავლობაში განსახორციელებელი პროექტებისა და პროგრამების შესახებ.









 


big_banner
არქივი