საქართველოში უკრაინის საპრეზიდენტო არჩევნების მეორე ტურში ოპოზიციონერმა კანდიდატმა ვლადიმირ ზელენსკიმ გაიმარჯვა.

უკრაინის ცენტრალური საარჩევნო კომისიის ვებგვერდზე გამოქვეყნებული მონაცემებით, ზელენსკიმ საქართველოში უკრაინის საელჩოს ტერიტორიაზე გახსნილ უბანზე ხმათა 50,38% დააგროვა. მეორე ტურში უკრაინის 389 მოქალაქე მონაწილეობდა.

ზელენსკიმ გაიმარჯვა აზერბაიჯანშიც, სადაც მას ამომრჩეველთა 51,50 %- მიემხრო. შოუმენი აირჩიეს ბელარუსში მცხოვრებმა უკრაინელებმაც - 68,48.

პოროშენკომ გაიმარჯვა ავსტრალიაში, სადაც მან ხმები 72,72% მიიღო. ასევე ავსტრიაში – 66,36%;

ისრაელში მცხოვრებმა უკრაინელებმა მეორე ტურში პოროშენკო აირჩიეს – 50,46%; პოროშენკომ გაიმარჯვა ასევე აშშ-ში, კანადაში, ჩინეთში, ბელგიაში, დანიაში, ესპანეთში, იტალიაში, ნიდერლანდებში, ნორვეგიაში, შვედეთში, დიდ ბრიტანეთსა და გერმანიაშიც.

გერმანიაში, სადაც ყველაზე მეტი საარჩევნო უბანი იყო გახსნილი, პოროშენკოს ხმა 3 840 ამომრჩეველმა მისცა, ხოლო ზელენსკის - 3022-მა.

დიდი უპირატესობით გაიმარჯვა უკრაინის მოქმედმა პრეზიდენტმა აშშ-იც. პოროშენკოს ხმა 2598 ამომრჩეველმა მისცა, ხოლო ზელენსკის 865 მიემხრო.

მოლდოვაში, უნგრეთში, სლოვაკეთში, პოლონეთში, ლატვიასა და ლიეტუვაში უკრაინის მოქალაქეებმა უპირატესობა ვლადიმირ ზელენსკის მიანიჭეს.

სულ საზღვარგარეთ გახსნილ უბნებზე პოროშენკომ ხმათა 53,7% მიიღო, ხოლო ზელენსკიმ -44,83%.