logo_geo
ლაშა იორდანიშვილი: წინა ხელისუფლების დროს განხორციელებული ანალოგიური ენერგოპროექტები აღქმული იყო, როგორც ყველაზე წარმატებული, ახლა კი...
- +

24 აპრილი. 2019. 17:02

 

 

„ბოლო წლების განმავლობაში ჩვენ ათზე მეტი ჰიდროელექტროსადგური შევიყვანეთ ექსპლუატაციაში, რომლის სიმძლავრე 150 მეგავატს აჭარბებს და ჯამური გამომუშავება დაახლოებით 700 მილიონია, რომელიც მთლიანად ადგილობრივ ბაზარს ემსახურება“, - ამის შესახებ კომპანია „ფერის“ გენერალურმა დირექტორმა ლაშა იორდანიშვილმა დღეს გამართულ პრესკონფერენციაზე  განაცხადა.

 

მისი თქმით, კომპანია „ფერის“ 1990 წლის შემდეგ განხორციელებული აქვს  ქვეყნისთვის სასიცოცხლო მნიშვნელობის ინფრასტრუქტურული თუ ენერგეტიკული პროექტები. კომპანიაში დასაქმებულია 1000-ზე მეტი ადამიანი.

 

ენერგეტიკული პროექტებიდან ლაშა იორდანიშვილი ყველაზე წარმატებულ - „დარიალის ჰიდროელექტროსადგურს“ გამოყოფს, რომელიც მისი თქმით, 2011 წლამდე - წინა ხელისუფლების დროს აღიარებული იყო როგორს ქვეყნის გადარჩენის და ენერგოდამოუკიდებლობის მაგალითი. ანალოგიური შეიძლება ითქვას „ხადორი-2“-ზეც.

 

მისი თქმით, მაშინ არასამთავრობოებიც და მედიაც ამ პროექტების პოპულარიზაციას ეწეოდნენ და მხარდაჭერას გამოხატავდნენ ახლა კი ნგრევის სიმბოლოდ აქციეს.

 

„ხადორი 2“, რომელიც 2011 წელს დაიწყო და 2012 წელს დასრულდა  არის ის წარმატებული პროექტი, რომლითაც ჩვენ ვამაყობთ. ამ პროექტს ჰქონდა ძალიან დადებითი გამოხმაურება. მე შემეძლო ამ პროექტით ჯილდოც მიმეღო და მადლობაც გადაეხადათ. დღეს კი თურმე იდენტური „ხადორი 3“-ის პროექტი, გარემოზე შედარებით მცირე ზიანით, იმ ტერიტორიისთვის შეიძლება დამაზიანებელი აღმოჩნდეს“, - აცხადებს ლაშა იორდანიშვილი.

 

მისი თქმით, „ხადორი-3“-ს არ გააჩნია სათავე ნაგებობაც კი, არ ხდება მდინარის გადაკვეთა,  არანაირი კერძო საკუთრების შეხება, არ დაიტბორება არცერთი კვადრატული მეტრი.

 

„ეს არის ერივაციული ტიპის სადგური, რომელიც წყალს მოიხმარს არსებული „ხადორი-1“-ის  ელექტროსადგურიდან და მიემართება დაღმავალი მიმართულებით, გაწვდება დაახლოებით 25 ოჯახს და ამის შემდეგ მდინარე ისევ მიდის ალაზნის კალაპოტისკენ.  მოსახლეობის 98-99% პროცენტი ვერ გრძნობს, რომ რამე შეხება ჰქონდათ ამ მდინარესთან“, - განაცხადა იორდანიშვილმა.

 

კომპანიის გენდირექტორი სიცრუეს უწოდებს ინფორმაციას იმის შესახებ, რომ წყალი დაშრება.

 

„ჩვენ გვაქვს სანიტარიული ნორმები, რომლითაც ვხელმძღვანელობთ. გარდა ამისა, მდინარე ალაზანს ამ მონაკვეთზე უერთდება სამი მდინარე და გამორიცხულია მდინარის დაშრობა. ესეც მოსახლეობის შეცდომაში შეყვანას ემსახურებოდა.

 

ჩვენ არაერთ ოჯახს დავპირდით სოციალურ პროექტებს და მათ შორის იყო სასმელი წყლის პროექტის განვითარება, აქ არის ასეულობით ოჯახი, რომელსაც სასმელი წყალი  წლების განმავლობაში არ მიეწოდება.  ჩვენ ასევე ვიმუშავეთ ადგილობრივ მოსახლეობასთან სხვადასხვა სოციალურ პროექტებზე, მათ შორის იყო ომალო-ბირკიანის დამაკავშირებელი  საავტომობილო ხიდის მშენებლობა, ხეობისთვის ფონდის შექმნა, რომელშიც ყოველწლიურად 120 000 ლარი შევიდოდა, იქ იყო ასევე უშუალოდ სოფელი ბირკიანი და ძიბახევი, სადაც ეს სადგური შენდებოდა, მათთვის ცალკე ფონდის შექმნა და ცალკე სხვადასხვა ტიპის ვალდებულებების აღება და სხვა“, - განაცხადა იორდანიშვილმა.

 

 

big_banner
არქივი