ფშაველი-აბანო-ომალოს გზაზე გუშინ მომხდარი ტრაგედის გამო, „თუში მეცხვარის დღე – თუშეთობა“ აღარ გაიმართება. ამის შესახებ ახმეტის მუნიციპალიტეტის მერია განცხადებას ავრცელებს.

„3 აგვისტოს, ახმეტის მუნიციპალიტეტის მერიისა და დაცული ტერიტორიების სააგენტოს ორგანიზებით, თუშეთის სოფელ ომალოში დაგეგმილი იყო ტრადიციული ღონისძიების ჩატარება, მაგრამ გუშინ მომხდარი უმძიმესი ტრაგედიის გამო, ღონისძიება აღარ ჩატარდება. ახმეტის მუნიციპალიტეტის მერია და საკრებულო ღრმა მწუხარებას გამოთქვამენ მომხდარის გამო და სამძიმარს უცხადებენ გარდაცვლილთა ოჯახებს“, – ნათქვამია განცხადებაში.

ტრადიციული სახალხო დღესასწაული „მეცხვარის დღე – თუშეთობას ,ყოველწლიურად სოფელ ომალოში აღნიშნავენ. სადაც სხვადასხვა კულტურული და სპორტული ღონისძიებები იმართება.

შეგახსენებთ, რომ ფშაველი-აბანო-ომალოს გზაზე გუშინ, 27 ივლისს, „კამაზის“ მარკის ავტომანქანა, რომლითაც 12 ადამიანი მგზავრობდა, ხევში გადავარდა. ავარიის შედეგად გარდაიცვალა 6 ადამიანი, 3 კი დაშავდა. ერთ მოქალაქეს მაშველები ამ დრომდე ეძებენ.