გორში მეცხრეკლასელ მოსწავლეს რამდენიმე მოზარდმა ფიზიკური შეურაცხყოფა მიაყენა.
ინციდენტი გორის მე-10 საჯარო სკოლასთან მოხდა.
მომხდარს ადასტურებენ გორის საგანმანათლებლო რესურსცენტრში. როგორც რესურსცენტრის ხელმძღვანელი ნანა ტერმაკოზაშვილი აცხადებს, ფიზიკური დაპირისპირება სასწავლო პროცესის შემდეგ, სკოლის შენობის გარეთ მოხდა. მისივე ინფორმაციით, ერთ მოსწავლეს რამდენიმე მოზარდმა სცემა.
მოზარდს შესაბამისი სამედიცინო დახმარება საავადმყოფოში უკვე აღმოუჩინეს. ექიმების ინფორმაციით, მეცხრეკლასელის ჯანმრთელობას საფრთხე არ ემუქრება.