logo_geo
„მენატრება ყველა ის წამი და წუთი, როცა ბედნიერი ვიყავი“ – ბლიც-ინტერვიუ ნინო ლაბარტყავასთან
- +

3 აპრილი. 2018. 20:19


 

ნინო ლაბარტყავა არის ჟურნალისტი და გახლავთ სამეგრელოს მხარიდან:


მაღიზიანებს -  არასასიამოვნო მუსიკა, უპასუხისმგებლო ადამიანები და ზღვარგადასული უზრდელობა.


ვგრძნობ - ვგრძნობ, რომ სამყარო შეიცვალა.


მეშინია - იმ წუთის, რომელმაც შეიძლება დიდი ტკივილი მომაყენოს. მეშინია ჩემს მიერ, ნებსით თუ უნებლიედ, ჩადენილი ცოდვების შედეგების და კიდევ იმის, რომ ზედმეტად მკაცრად ვაფასებ საკუთარ თავს.


ვიცი - ვიცი, რომ ყველა ადამიანი უნიკალურია.  ვიცი, რომ კიდევ ძალიან ბევრი მაქვს სასწავლი. 


არ ვიცი - ბევრი რამ. მათ შორის, შეიძლება ისიც არ ვიცი, რაც მგონია, რომ კარგად ვიცი.


შემიძლია - სიყვარული, თანადგომა და რეალობის ადეკვატურად შეფასება.


არ შემიძლია - ღალატი, თვალთმაქცობა და თავის მოტყუება.


ვმეგობრობ - ვცდილობ, ვიმეგობრო ყველასთან, ვისაც ჩემთან მეგობრობის სურვილი აქვს.


ვაპატიებ - მხოლოდ ჩემთვის ძვირფას ადამიანებს ვაპატიებ რაღაცებს, თუმცა ამაშიც არსებობს ზღვარი -  ყოველთვის პატიება არ შემიძლია.


ვტირი - ამ ბოლო დროს ხშირად ვტირი და ხშირ შემთხვევაში, ამის მიზეზია სოციალურ ქსელებში გავრცელებული ისტორიები, ან ვიდეოები, რომლებიც ავადმყოფ, უდედმამო ბავშვებს ეხებათ. მატირებს ჩემი უმწეობის განცდა, რომ სამწუხაროდ, ყველა მათგანის დახმარება არ შემიძლია...


ვიცინი - კარგ ხუმრობაზე, ჩემი შვილის უცნაურ კითხვებზე და საკუთარ სელფებზე ))


ვეძებ - სიმშვიდეს, საკუთარ ადგილს ცხოვრებაში და ბეჭედს, რომელიც ჩემმა შვილმა მაჩუქა და დავკარგე :(


ღირსი ვარ - საკუთარი თავის.


ვჩხუბობ - მხოლოდ მაშინ, როცა სხვა გზას არ მიტოვებენ. ხშირად ვჩხუბობ შეუგნებელ ადამიანებთან.


ვკარგავ - ჩემთვის არასაინტერესო და არასიმპათიურ ადამიანებს. ვკარგავ საღად აზროვნების უნარს, როცა ჩემს თვალწინ ვინმეს ჩაგრავენ.


მშურს - „მშურს" მათი, ვისაც ერთზე მეტი შვილი ჰყავთ.


ვემალები - ადამიანებს, რომლებიც თავს მაბეზრებენ ზედმეტი ყურადღებით.


ვემტერები - საკუთარ მავნე ჩვევებს, რომლებსაც ჯერჯერობით, ვერ ვამარცხებ.


მაინტერესებს - როგორი ვარ სინამდვილეში...


არ მაინტერესებს - ჯაზი, უსარგებლო ინფორმაციების კითხვა და ადამიანები, რომლებსაც საკუთარ თავზე ძალიან დიდი წარმოდგენა აქვთ.


მახსოვს - ყველა ის ამბავი, რომელმაც ჩემს ცხოვრებაში მნიშვნელოვანი როლი შეასრულა.


მრცხვენია - საკუთარი სიხისტის და ემოციით  ნათქვამი უხეში სიტყვების.


უარვყოფ - ნეგატიურ ფიქრებს და ადამიანებს, ვისაც ჩემთვის ზიანის მოყენება უნდათ.


ვავადმყოფობ - საკმაოდ ხშირად - წლების წინ, ავტოავარიაში მოყოლის შემდეგ, თავის ტკივილები დამჩემდა, რომელიც ორ კვირაში ერთხელ მაინც მახსენებს თავს.


ვმალავ - თუ ახლა ვთქვი რას ვმალავ, გამოდის, რომ აღარ ვმალავ )) ამიტომ არ ვიტყვი :)


ვინახავ - სხვების მიერ ჩემთვის განდობილ საიდუმლოებებს.


მწამს - ღმერთის არსებობის და არ მწამს შემთხვევითობების - მგონია, რომ ყველაფერს, რაც ჩვენს ცხოვრებაში ხდება, თავისი კონკრეტული მიზეზი და დანიშნულება აქვს.

 

მიკვირს - როგორ მოვედი აქამდე და როგორ შევინარჩუნე ცხოვრების ხალისი.


მიხარია - ჩემი შვილის წარმატებები;  მიხარია, როცა ბედნიერ ადამიანებს ვხედავ და როცა გარეთ მზიანი ამინდია :)

 

ვჭორაობ - იშვიათად, თუმცა მაშინაც ისე, რომ ამით ვინმეს ზიანი არ მივაყენო.


ვდარდობ - როცა რამეზე ვდარდობ, მაშინ ვფიქრობ ძალიან ბევრს... ან პირიქით - როცა ძალიან ბევრს ვფიქრობ, მაშინ ვიწყებ დარდს...

 

ვამაყობ - იმ ძალიან მნიშვნელოვანი გადაწყვეტილებების  მიღების გამო, რომელიც ცხოვრების გარკვეულ ეტაპებზე მივიღე და რომლებმაც ჩემს ცხოვრებას სულ სხვა აზრი შესძინა.


ვაკეთებ - ბევრ რამეს, თუმცა სულ მაქვს განცდა, რომ უფრო მეტის გაკეთება შემიძლია.


ვეფერები - ვგიჟდები მოფერებაზე... ხშირად ვეფერები ჩემთვის საყვარელ ადამიანებს, სითბოს გაცემაში თავს არასდროს არ ვიზღუდავ.


მსიამოვნებს - როცა ჩემი ესმით და მიღებენ ისეთს, როგორიც ვარ.


მესიზმრება - ფერადი, „სცენარიანი" სიზმრები... თუმცა იყო შემთხვევა, ისეთი კოშმარი დამესიზმრა, დღემდე ვერ მოვედი აზრზე.


ვეხმარები - აბსოლუტურად ყველას, როცა ამის საშუალება მაქვს.


ვეწევი - საკმაოდ ბევრს... სტრესის მოსახსნელად და გართობისთვის, მარიხუანაც მომიწევია :)


მწყინს - საწყენი უცებ მწყინს, მომენტალურად და ამას არასდროს ვმალავ.  კარგი ისაა, რომ წყენას გულში არ ვიდებ, თუმცა მწყენილებლის მიმართ დამოკიდებულება მეცვლება და მერე დისტანციური ვხდები.


ვხარჯავ - აბსოლუტურად უანგაროდ და სიამოვნებით შემიძლია, ვხარჯო ფული, საყვარელი ადამიანის გასახარებლად. ამასთან, არ მიყვარს დროის ხარჯვა არაფრის მომტან ურთიერთობებზე და ადამიანებზე, რომლებსაც ვერ გაუგიათ, რა უნდათ ჩემგან.


ვღალატობ - არ შემიძლია არავის ღალატი... ამას მირჩევნია, საერთოდ დავასრულო კონკრეტულ ადამიანთან ურთიერთობა, მეგობარი იქნება ეს, თუ შეყვარებული.


ვკამათობ - ყველაფერზე, რაც საკამათოდ მიმაჩნია, თუმცა არა - ყველასთან.


ვუხეშობ - მხოლოდ მაშინ, როცა მეუხეშებიან.

 

ვუსმენ - ყოველთვის ვუსმენ მუსიკას და ჩემთვის მნიშვნელოვანი ადამიანების ნათქვამებს.


ვყოყმანობ - იშვიათად. დაკვირვებული ვარ - ყოყმანისას რა გადაწყვეტილებაც პირველი მოდის, თითქმის ყოველთვის ის არის სწორი.


ვკითხულობ - ბევრ ინფორმაციას. რაც შეეხება წიგნებს - სამი წელია, ვკითხულობ წიგნს „დავრიში და სიკვდილი" - ასეთი „რთულად დასამორჩილებელი" და საინტერესო ფილოსოფიური რომანი იშვიათად შემხვედრია ))


ვამზადებ - როგორც ამბობენ, კარგი მზარეული ვარ. მიყვარს ყველა კერძში, მინიმუმ, ერთი რაიმე განსხვავებული ინგრედიენტის დამატება.


ვუყურებ - ხშირად ვუყურებ სერიალებს. ცოტა ხნის წინ დავასრულე „ახალგაზრდა პაპის" ყურება და ახლა „ბანქოს სახლი" დავიწყე - დიდი ხანია, ამის ნახვა მინდოდა და როგორც იქნა, ჩავუჯექი ))


ვკლავ - ძალიან მარტივად „ვკლავ" საკუთარ თავში იმ გრძნობას, რომლის „მოკვლასაც" მაიძულებენ, საკუთარი უაზრო საქციელებით.


ვაფუჭებ - შეგნებულად არაფერს ვაფუჭებ, უბრალოდ ასე ხდება ხოლმე ხანდახან :)


ვცხოვრობ- ისე, როგორც მინდა. ხალხის აზრი ჩემს გადაწყვეტილებებზე გავლენას არ ახდენს.


ვცემ - ყველას, ვინც ჩემი ოჯახის წევრებს შეეხება. თუ საჭიროა, სრულიად უცნობი ადამიანის დასაცავადაც ავაწნავ მჩაგვრელს - გამიკეთებია კიდეც ასე.


ვყვირი - მაშინ, როცა ძალიან გაბრაზებული ვარ და ეს კარგი სანახავი ნამდვილად არ არის :)


ვმღერი - უფრო - ვღიღინებ, ჩემთვის და ეს ნებისმიერ ადგილას შეიძლება მოხდეს.


ვასრულებ - მარტივად ვასრულებ ურთიერთობებს, რომელიც მომბეზრდა და რომელსაც ჩემთვის ბედნიერება აღარ მოაქვს.


დავდივარ - ხშირად დავდივარ ქუჩაში მარტო, ყურსასმენებში მუსიკებს ვუსმენ, ჭიქა ყავის თანხლებით. განსაკუთრებით მომწონს ისეთ უბნებში ხეტიალი, სადაც ნამყოფი არ ვარ.


ვმკურნალობ - არაფერს, დროთა განმავლობაში ყველაფერს ყოველდღიური ცხოვრება თავად კურნავს. ჯანმრთელობის მხრივ - თავის ტკივილებს ))


ვერიდები - ისეთ ადამიანებთან ურთიერთობას, რომლებიც ჩემზე უარყოფითად მოქმედებენ. ბოლო წუთამდე ვცდილობ, მოვერიდო კონფლიქტურ სიტუაციებს.


ვთამაშობ - უჰ,  არა, არაფერს და არასდროს არ ვთამაშობ.

 

ვიტყუები - ძალიან იშვიათად. ყოველთვის ვცდილობ, ვიყო მართალი საკუთარ თავთანაც და სხვებთანაც.

 

ვეთაყვანები - ყველაფერს, რაც პატივისცემის და აღტაცების ღირსია.


ვგიჟდები - ვგიჟდები, როცა ადამიანს არ ესმის, რას ეუბნები და არაერთი ახსნის მიუხედავად, ისევ ვერ იგებს... კარგი გაგებით კი - ვგიჟდები სასიამოვნო სიურპრიზებზე და კარგ ამბებზე.


მიყვარს - რა თქმა უნდა, ჩემი შვილი, ეს საოცარი ადამიანი...  მიყვარს კეთილი და სამართლიანი ადამიანები.


ვოცნებობ - ხშირად და სიამოვნებით, ძილის წინ :)


ვფიქრობ- ყოველწუთს, ათას რამეზე, ძალიან ბევრს...


მძულს - ბოროტი ადამიანები. ადამიანები, რომლებიც სხვებს ცხოვრებას უნგრევენ, საკუთარი მიზანმიმართულად ბოროტული საქციელებით.


ვნანობ- ადამიანისთვის სინანული აუცილებელია, რომ განვითარდეს და ადამიანის სახე არ დაკარგოს. მეც ვნანობ რაღაცებს, მაგრამ ამისგან ტრაგედიას არ ვქმნი არასდროს.


კმაყოფილი ვარ - საკუთარი პიროვნული სიძლიერით და იმით, რომ ყოველთვის სამართლიანი ვარ.


მენატრება - ყველა ის წამი და წუთი, როცა ბედნიერი ვიყავი.


მსურს - ყოველთვის შევინარჩუნო ოპტიმიზმი, სიყვარულის უნარი და მსურს, ბევრი ადამიანის დახმარება შევძლო.


ვაგროვებ - ჩემი შვილის ყველა წერილს და საჩუქარს, რომელსაც ის, თითქმის, ყოველდღიურად მჩუქნის. ხო, კიდევ - ბავშვობიდან ვაგროვებ სხვადასხვა ფერის და ორნამენტის ხელსახოც ქაღალდებს ))


ვიხდი - ორაზროვანი კითხვაა... )) სიამოვნებით ვიხდი ფულს ჩემი შვილის ტანსაცმელში, საჩუქრებში... გახდით კი მხოლოდ ორ შემთხვევაში ვიხდი  - აღარ დავკონკრეტდები, მგონი, გასაგებია ისედაც )))) )))


ვეჭვიანობ - უსაფუძვლოდ ეჭვიანობა არ ვიცი, თუმცა არც დრამებს ვდგამ. ვეჭვიანობ მაშინ, როცა კონკრეტული ადამიანი ჩემთვის საინტერესოა. პრობლემა მაშინ ჩნდება, თუკი აღარ ვეჭვიანობ ))


„ვკაიფობ" - ყველა იმ წუთით, რომელსაც სიყვარული და სიამოვნება მოაქვს. კიდევ, „ვკაიფობ" ადამიანებზე, რომლებიც ვერ ხვდებიან, რომ „ვეკაიფები" )))


ვიზიდავ - ხიფათებს და ... ))


ვალამაზებ - დღეებს, რომელსაც „ვცხოვრობ". 


გამოყენებულია ირაკლი ჩარკვიანის ბლიც-ინტერვიუს კითხვები.


ავტორი: დიანა ლიპარტელიანი


 

 

 

 

წყარო : wyaro
big_banner
არქივი