logo_geo
იაკობ გოგებაშვილის „დედა ენა“ სკოლებში 2019 წლიდან დაბრუნდება
- +

14 დეკემბერი. 2018. 01:05

 

 

მომავალი სასწავლო წლიდან, იაკობ გოგებაშვილის „დედა ენა“ სკოლებში დაბრუნდება.

 

აღნიშნულ ინიციატივასთან დაკავშირებით განათლების, მეცნიერების, კულტურისა და სპორტის სამინისტროში კომისია შეიქმნება, რომელიც იაკობ გოგებაშვილის დედაენის შინაარსობრივი ნაწილის შეჯერებასა და დამტკიცებაზე იმუშავებს.

 

„მედიაცენტრი მთავარი“ საქართველოს, პარლამენტის განათლების, კულტურისა და მეცნიერების კომიტეტის თავმჯდომარე მარიამ ჯაშს ესაუბრა:

 

– იაკობ გოგებაშვილის „დედა ენის“ სასწავლო სახელმძღვანელოებიდან ამოღებას საკმაოდ ნეგატიური შეფასებები მოჰყვა. როგორ შეაფასებთ მიღებულ შედეგს?

 

- მიღებული შედეგების შეფასება ცალსახად რთულია. ყველაზე მნიშვნელოვანი ის არის, რომ, როგორც საზოგადოების, ასევე პედაგოგიური კორპუსის მხრიდან იყო თხოვნა და რეკომენდაცია, რომ სწავლების პროცესში ის უნიკალური მეთოდი დაბრუნებულიყო, რომელსაც იაკობ გოგებაშვილის „დედა ენა“ მოიცავს. მიუხედავად იმისა რომ, სხვადასხვა სკოლაში იაკობ გოგებაშვილისეული მეთოდიკით ისწავლება, საკმაოდ მრავალფეროვანი აღმოჩნდა ის სახელმძღვანელოები, რომელიც სკოლებში არსებობს. დედა ენის პედაგოგიური მეთოდიკის ძირითადი პრინციპები, რასაც კულტურული მემკვიდრეობის სტატუსი გააჩნია, გარკვეულწილად გაიფანტა. სწორედ ამიტომ, ამ ტემაზე საუბარი გასული წლის გაზაფხულზე დავიწყეთ. რადგანაც მაშინ სახელმძღვანელოების გრიფირების პროცესი მიმდინარეობდა, პროცესებში უხეში ჩარევისგან თავი შევიკავეთ.

 

– რა ეტაპზე ხართ ამჯერად – საკითხი ინიციატივის დონეზეა თუ კონკრეტული გეგმები არსებობს?

 

– განათლების სამინისტროში იქმნება ეროვნული კომისია, რომელიც იაკობ გოგებაშვილის დედა ენის შინაარსობრივი ნაწილის შეჯერებაზე იმუშავებს. შემდეგ კი მისი დამტკიცება მოხდება. ეს გახდება ერთიანი სახელმძღვანელო, რომელიც სკოლებში დაინერგება როგორც საანბანო სახელმძღვანელო. გარდა აღნიშნულისა, არსებობს მზაობა, რომ კულტურული მემკვიდრეობის ის ძეგლები, რომლებიც განათლების სამინისტროში გამოიყენება, კანონმდებლობით დაცული იყოს. უკვე დავარეგისტრირეთ ინიციატივა, რომ ეროვნული ან საერთაშორისო კატეგორიის არამატერიალური კულტურული მემკვიდრეობის ძეგლის სტატუსის მქონე მეთოდის საფუძველზე შექმნილი ნებისმიერი სახელმძღვანელოს მომზადება და გრიფირება სპეციალური წესით ხდებოდეს.

 

– „დედა ენამ“ ცვლილება არაერთხელ განიცადა. ამჯერად, სკოლებში „დედა ენის“ რომელი ვარიანტის დაბრუნებას განიხილავთ?

 

– გეთანხმებით, 1876 წლიდან მოყოლებული, იმ ოცდაათზე მეტი გამოცემის შემდგომ „დედა ენის“ სახელმძღვანელო არაერთხელ შეიცვალა. იაკობ გოგებაშვილის ანდერძის მიხედვით, „დედა ენა“ ყოველთვის უნდა განიცდიდეს განახლებას და გაუმჯობესებას. ამდენად, საზოგადოების, შესაბამისი პედაგოგიკის და ენათმეცნიერების ჩართულობით, იმ შინაარსზე მოხდება შეჯერება, რომელიც თანამედროვეობისთვისაც მისაღები იქნება და იაკობ გოგებაშვილის სწავლების ძირითად ფუნდამენტურ პრინციპებსაც შეინარჩუნებს.

 

ესაუბრა მარიამ გელაშვილი

 

 

წყარო : wyaro
big_banner
არქივი