ვისთვისაც საკუთარ ეზოში მუშაობა სიამოვნებაა კარგად იცის, რომ ლამაზი და შთამბეჭდავი გარემოს შესაქმნელად, შრომასთან ერთად გარკვეული ცოდნაცაა საჭირო. რა თქმა უნდა ყვავილების დარგვა ახალ დამწყებ მებაღესაც შეუძლია, თუმცა აუცილებელი, რომ ამ პროცესს სერიოზულად მიუდგეთ, რადგან ყვავილებით ბაღის მორთვა გემოვნებით და გარკვეული სიზუსტით მოახდინოთ. ყველამ კარგად ვიცით, რომ ლამაზი ბაღისთვის მხოლოდ ყვავილის დარგვა არაა საკმარისი და აუცილებელია მათზე ზრუნვა. დღეს ჩვენ იმ ყვავილებს გაგაცნობთ, რომლებიც ეზოს ყველაზე წარმატებულად აფორმებენ და ასევე წარმოგიდგენთ სხვადასხვა კომპოზიციების მაგალითებსაც, რათა თქვენი ბაღის მომზადება გაგიადვილოთ.

სანამ ყვავილს დავრგავთ აუცილებელია ლანდშაფტის დიზაინის თავისებურებების შესწავლა, შესაფერისი ადგილის ამორჩევა, შემდეგ კი ერთმანეთთან ჰარმონიულად შეთავსებადი ყვავილების შერჩევა.

გაზონის მაგვარი ყვავილნარი - ბაღში ძალიან ეფექტურად გამოიყურება ყვავილების ერთგვარი ხალიჩა. გაზონის გარკვეულ ნაწილში შეგიძლიათ ერთად დათესოთ ისეთი მინდვრის ყვავილები, როგორიცაა გვირილა, ყაყაჩო, სამყურა, ღიღილო. ასეთი ყვავილები არ საჭიროებს მორწყვას და ადგილს თვალწარმტაც სანახაობად აქცევს, სადაც პიკნიკის გამართვაც კი მოგინდებათ.

ყვავილების დარგვა ვიწრო ზოლადაც შეგიძლიათ, რომელიც დიდ ტერასის, ან ბაღის გასწვრივ არსებულ ღობეს შეალამაზებს. ასეთ წყობას, გრძელი ან საშუალო სიმაღლის ყვავილები მოუხდება (მაგ. გვირილა, სალვია) ისინის ზოლებად უნდა დარგოთ. კარგი იქნება თუ სხვადსხვა ფერის, ერთმანეთთან შესაფერის ყვავილს ამოირჩევთ. თუ ერთი ფერის ყვავილი გსურთ მაშინ გირჩევთ, რომ არჩევანი ერთწლოვან მცენარეზე შეაჩეროთ, რადგან შემდეგ წელს შეიძლება სხვა ფერის ყვავილის დარგვა მოგინდეთ.

თავად ყვავილნარი შეგიძლიათ სხვადასხვა ფორმის გააკეთოთ, იქნება ეს მრგვალი, კვადრატული, თუ რომბის ფორმის ამას მნიშვნელობა არ აქვს. ასევე შეგიძლიათ ყვავილების მწკრივი 10-15 სმ-ის შემაღლებაზე დათესოთ და ქვებით, აგურებით, ან სხვა დეკორით მორთოთ. თუ ბაღში თაღოვანი სტრუქტურა გაქვთ და გინდათ, რომ ის მცენარეებით დაიფაროს, გირჩევთ გამოიყენოთ კლემატისი, მცოცავი ვარდი, უსურვაზი, დეკორატიული ლობიო და სხვა მცოცავი მცენარეები გამოიყენოთ.

ბაღის მცენარეების შერჩევისას აუცილებლად გაითვალისწინეთ სეზონურობაც. ისინი, ისე უნდა შეირჩეს, რომ წელიწადის ნებისმიერ დროს თავისებურად ლამაზი იყოს. დარგეთ უცუნა, ასტრები, ქრიზანთემები, ყოჩივარდები და გეორგინები, როლებიც გვიან შემოდგომას ყვავილობენ. კროკოსმია და რუდბეკია ზაფხულში იწყებენ ყვავილობას და ადრე შემოდგომამდე აგრძელებენ. ზამთრის ბაღისთვის კი კარგია მარადმწვანე მცენარეები, ასევე ხარისძირა, ქონდარა ზამბახი და სხვ. დარწმუნებული ვარ, მცირედი მონდომების შედეგად აუცილებლად შესძლებთ ლამაზი და სასიამოვნო გარემოს შექმნას თქვენს ბაღში. ნელ-ნელა შემატეთ თქვენს ბაღს სხვადასხვა მცენარეები და ძალიან მალე თქვენი ქმნილებით აუცილებლად შესძლებთ ტკბობას.

წყარო http://metra.ge