„ჩვენ დღეს კონკრეტული, მნიშვნელოვანი ნაბიჯების გადადგმა მოგვიწევს, რაც შესაძლოა, ხშირად მტკივნეული აღმოჩნდეს, მაგრამ ეს ქალაქისთვის აუცილებელია", - განაცხადა თბილისის მერმა, კახა კალაძემ კახა კალაძემ პირველი არხის გადაცემაში „კვირის ინტერვიუ" სტუმრობისას.

მისივე თქმით, ის შრომას მიჩვეულია და მზად არის თბილისელებს ემსახუროს.

„წინასაარჩევნოდ პირობა დავდე, რომ შრომას მიჩვეული ადამიანი ვარ და მზად ვარ, ჩვენს ქალაქს, თბილისს, თბილისელებს ვემსახურო. სამუშაო ძალიან ბევრია და მზად ვართ, პრობლემები 24-საათიან რეჟიმში გადავჭრათ. ჩვენ დღეს კონკრეტული, მნიშვნელოვანი ნაბიჯების გადადგმა მოგვიწევს, რაც შესაძლოა, ხშირად მტკივნეული აღმოჩნდეს, მაგრამ ეს ქალაქისთვის აუცილებელია", - განაცხადა კალაძემ.

თბილისის მერი სახელმწიფო აუდიტის სამსახურის მიერ სხვადასხვა სამსახურის შემოწმების პროცესსაც გამოეხმაურა და აღნიშნა, რომ ეს ნორმალური პროცესია.

„მერია ძალიან დიდი სტრუქტურაა, თავისი შპს-ებით, აიპ-ებითა და სიპ-ებით, სადაც 22 500 ადამიანი მუშაობს, ამიტომ ყველა სამსახურზე ერთ კონკრეტულ ადამიანს, თუნდაც მერს, სრულყოფილი ინფორმაცია ვერ ექნება. სხვათა შორის, სანამ უფლებამოსილებას ოფიციალურად შევუდგებოდი, რამდენიმე სამსახურში სახელმწიფო აუდიტის სამსახური უკვე შესული იყო და კონკრეტულ სამსახურებს ამოწმებდა. ჩვენ უბრალოდ სხვა სამსახურების შემოწმებაც მოვითხოვეთ. ზოგადად, კარგია, როცა მონიტორინგი ხორციელდება და ეს ასეც უნდა იყოს", - განაცხადა კახა კალაძემ.