logo_geo
გიორგი გახარია: დიახ, „არა ჩადებას!“, რადგან გვაქვს იმდენი ინტელექტუალური რესურსი, რომ ჩადება არ დაგვჭირდეს
- +

5 მარტი. 2018. 11:28




შინაგან საქმეთა მინისტრის პირველი ინტერვიუ და პასუხები თითქმის ყველა აქტუალურ კითხვაზე. რას ჰყვება გიორგი გახარია არჩილ ტატუნაშვილის საქმეზე? ქალთა მიმართ ძალადობაზე? რა ეტაპზეა გახმაურებული მკვლელობების გამოძიება? აქვს თუ არა პოლიტიკური ამბიციები და განიხილავს თუ არა პრემიერ-მინისტრის თანამდებობაზე დანიშვნის შესაძლებლობას? მაშ ასე, „პრაიმტაიმი" გთავაზობთ ექსკლუზიურ ინტერვიუს შინაგან საქმეთა მინისტრთან.


- ბატონო გიორგი, საუბრის დასაწყისშივე მინდა გკითხოთ, არის თუ არა რაიმე სიახლე არჩილ ტატუნაშვილის საქართველოს მიერ კონტროლირებად ტერიტორიაზე გადმოსვენების მხრივ?


- პირველი რიგში, თქვენი გაზეთის საშუალებითაც მინდა სამძიმარი გამოვუცხადო გარდაცვლილის ოჯახს და მთლიანად ქვეყანას. ეს მართლაც მძიმე ტრაგედია. ამ ეტაპზე ერთმნიშვნელოვნად რისი თქმაც შემიძლია, არის ის, რომ სახელმწიფო მაქსიმალურად იყენებს მის ხელთ არსებულ ყველა რესურს. ვერ გეტყვით, რომ მნიშვნელოვანი პროგრესი გვაქვს, მაგრამ არსებობს გარკვეული იმედები. ყოველდღიურ რეჟიმში ვაგრძელებთ მუშაობას, სხვადასხვა ფორმატებში. იმედი მინდა გამოვთქვა, რომ ამ პრობლემის გადაწყვეტას გონივრულ ვადაში შევძლებთ. ეს არის ყველაზე მნიშვნელოვანი. ჩემთვის არა თანამდებობრივად, არამედ პიროვნულადაა გაუგებარი გარკვეული შეფასებების გაკეთება, რადგან ზოგიერთი ის შეფასება, რაც მე ბოლო დღეების განმავლობაში მოვისმინე, შეიძლება ხელისშემშლელიც კი იყოს ამ პროცესისთვის. ამიტომ მთელ საზოგადოებას გვმართებს ამ მიზნის ირგვლივ კონსოლიდირება.

 

- მომავალში რამდენად ვართ დაზღვეული მსგავსი ფაქტებისგან? ხომ არ ფიქრობთ, რომ გადასახედია დღეს არსებული პოლიტიკა და რეაგირების მექანიზმებიც გარკვეულწილად მეტ დახვეწას საჭიროებს?


- რას გულისხმობთ გადახედვაში?

 

- თუნდაც კონკრეტული პირების მიმართ საერთაშორისო სანქციების დაწესებას და ამ მიზნით პარტნიორებთან უფრო მეტ მუშაობას...


- ჩვენ ვმსჯელობთ ყველა შესაძლო ეფექტურ ფორმატზე, ძალისმიერის გარდა. ეს ჩვენი მოვალეობაც არის და ვალდებულებაც.

 

- სხვა თემებს რაც შეეხება... ქალთა მიმართ ძალადობა კვლავ სერიოზულ გამოწვევად რჩება... წლის განმავლობაში 2000-მდე შემაკავებელი ორდერი გამოიცა. როგორ წარმოგიდგენიათ ამ პრობლემასთან გამკლავება?


- მე, როგორც შინაგან საქმეთა მინისტრი, ამ პრობლემას მარტო ვერ გადავწყვეტ. როგორც ჩანს, შემაკავებელი ორდერების რაოდენობა კიდევ უფრო გაიზრდება. რაღაც პერიოდში, საზოგადოებასთან ერთობლივი მუშაობით შესაძლებელია ამ პრობლემის მოგვარება. ეს არ არის მხოლოდ სამართალდარღვევის, ან ძალადობის თემა. ეს ცოტა უფრო რთული პრობლემაა, ალბათ, სოციო-კულტურულიც. ჩვენი ფუნქციაა, კანონის ობიექტურად და ზედმიწევნით აღსრულება. მსგავს პრობლემას, მხოლოდ შემაკავებელი ორდერებით ვერ მოვერევით. საჭიროა, კულტურულ-საგანმანათლებლო კომპონენტის ჩართვა.


- ბოლო პერიოდში საკმაოდ გახშირდა საუბრები, რომ შესაძლებელია, ვიზა-ლიბერალიზაცია კითხვის ნიშნის ქვეშ დადგეს... თქვენ თუ ხედავთ ასეთ საფრთხეს და რამდენად კავშირშია ეს ევროპაში მოქმედ ქართულ კრიმინალურ სინდიკატთან?


- ისეთ საფრთხეს, რომელიც მოუგვარებელია, ვერ ვხედავ. რა თქმა უნდა, გარკვეული რისკები არსებობს, ზოგ შემთხვევაში საკმაოდ ობიექტურიც, თუმცა ყველაფერი არის იდენტიფიცირებადი და მოგვარებადი. მაგალითად, ფაქტია, რომ თავშესაფრის მთხოვნელთა რაოდენობა იზრდება. შესაბამისად, სახელმწიფოს მხრიდან უნდა გადაიდგას კონკრეტული ნაბიჯები, რომელიც ამ რისკს დააზღვევს. თავშესაფრის მაძიებელთა რიცხვის ზრდა, გარკვეულწილად უკავშირდება კრიმინალური კომპონენტის ზრდასაც, თუმცა ამ მხრივ სახეზეა მცირედი ზრდა და არავის არასდროს უთქვამს, რომ ეს არის კრიტიკული კომპონენტი, რომელმაც შეიძლება საფრთხე შეუქმნას ვიზა-ლიბერალიზაციას. მიუხედავად ამისა, რისკი, რომელსაც ჩვენი ევროპელი კოლეგები ხედავენ, რომ არ მოხდეს პირდაპირი კავშირი თავშესაფრის მაძიებლებსა და კრიმინალურ კომპონენტს შორის, ეს ცხადია, არსებობს და ამ მიმართულებით ვმუშაობთ კიდეც.


- და რაში გამოიხატება ეს მუშაობა?


- აღარაფერი რომ ვთქვათ ვიზიტებზე, გეტყვით მხოლოდ ინსტიტუციონალურ დონეზე გადადგმულ ნაბიჯებს. მაგალითად, ჩვენ ვაძლიერებთ პოლიციის ატაშეს ინსტიტუტს. ეს ინსტრუმენტი ისედაც ძალიან ეფექტურად მუშაობს. იგეგმება რაოდენობრივი ზრდა ამ მიმართულებით. გარდა ამისა, ჩვენ ამ თვეში უკვე საბოლოოდ გავაფორმებთ ხელშეკრულებას ევროპოლთან. საქართველო უკვე როგორც ევროპოლის სრულფასოვანი წევრი, მიიღებს კონკრეტულ შედეგებს, როგორც ინფორმაციის 24-საათიან რეჟიმში გაცვლის, ისე ბევრი სხვა კუთხით. ასევე, ვგეგმავთ მთელ რიგ საკანონმდებლო ცვლილებებს, მაგალითად, რთულდება გვარის შეცვლის პროცედურა. ანუ გაჩნდება რაღაც ინფორმაციული კომპონენტი, რომელიც შესაძლებლობას იძლევა, გაირკვეს, შეცვლილი აქვს თუ არა პიროვნებას გვარი. დაწყებულია ფართო საინფორმაციო კამპანია. ის, რომ თავშესაფრის მაძიებელთა რაოდენობა შეიძლება გაზრდილიყო, ამის მოლოდინი ჩვენც გვქონდა და ჩვენს ევროპელ პარტნიორებსაც, თუმცა მნიშვნელოვანია, ამ ყველაფერზე როგორ რეაგირებს სახელმწიფო. 


- ევროპული მედია ხშირად წერს ქართველ კრიმინალებზე... როგორ ფიქრობთ, რამდენად სერიოზულ თავის ტკივილს წარმოადგენს ევროპისთვის ქართული კრიმინალური სამყარო?


- ევროპის პრესა, ასევე, წერს რუსულ, იტალიურ, ბალკანურ და კიდევ ბევრ კრიმინალურ დაჯგუფებებზე, მათ შორის ქართულზეც, თუმცა ერთმნიშვნელოვნად შემიძლია ვთქვა, რომ ქართული კრიმინალური დაჯგუფებები არ არის სტრუქტურირებული ქსელის სახით ჩამოყალიბებული. ძირითადად ეს არის წვრილმანი ქურდობები და მსგავსი არაკანონიერი ქმედებები, რაც ასევე გამაღიზიანებელია.


- საკმაოდ მოულოდნელი იყო, როდესაც თქვენი უწყების „facebook-ის" გვერდზე გამოჩნდა ჰაშთაგი #არაჩადებას... რისი თქმა გსურდათ ამით?


- თქვენ მოგეწონათ?


- სიმართლე გითხრათ, სასიამოვნოდ გაკვირვებული დავრჩი...


- რატომ?


- ბევრმა ჩათვალა, რომ ეს იყო მანკიერი პრაქტიკის აღიარება და განაცხადი, რომ შსს აღარ აპირებს ამ მეთოდით ადამიანების დევნას...


- რა უფრო მნიშვნელოვანი იყო თქვენთვის - მიდგომები რომ შეიცვალა, თუ რაღაც აღიარა სამინისტრომ?


- თავისთავად აღიარება ნიშნავს, რომ ცვლილებებისთვის მზაობას აცხადებთ - ასე არ არის?


- რეალურად, ეს არ ყოფილა აღიარება, მიუხედავად იმისა, რომ ბევრი განაცხადი და პრეტენზია იყო ამ თემაზე.


- აბა, რა გინდოდათ გეთქვათ?


- კი ბატონო, აგიხსნით. ხშირად საუბარი იმაზე, რომ „მცემეს", „ჩამიდეს" და ა.შ. ხდება დაცვის სტრატეგიიდან გამომდინარე. დამნაშავეებთან ერთად ამ მეთოდს ხშირად მათი დამცველებიც ეფექტურად იყენებენ. ეს არის ფაქტი და ამას ვერსად გავექცევით. ისიც ფაქტია, რომ დღეს სახელმწიფო ინსტიტუტები გახდნენ უფრო მგრძნობიარეები მსგავსი ბრალდებების მიმართ. ჩვენ ამ განაცხადით ვთქვით, რომ ჩადება არ გვჭირდება. არ გვჭირდება რამდენიმე მიზეზის გამო: ჩვენ 21-ე საუკუნეში ვცხოვრობთ. დიახ, #არაჩადებას, რადგან შინაგან საქმეთა სამინისტროს აქვს იმდენი ინტელექტუალური რესურსი, რომ ჩადება არ დაგვჭირდეს. შეგიძლიათ, გაესაუბროთ ჩემს მოადგილეებსაც, დეპარტამენტის ხელმძღვანელებს... ჩადება ამ ხალხისთვის არის შეურაცხმყოფელი. მე არაფერს არ გამოვრიცხავ არც წარსულში და არც მომავალში, მაგრამ ჩვენი გაცხადებული პოლიტიკაა, რომ, თუკი ასეთი რამ მოხდება, პასუხი იქნება ადეკვატური და მკაცრი, ვინც არ უნდა გააკეთოს. ეს არის პოლიციელების კეთილსინდისიერების შეურაცხყოფა.

 

- არის ასეთი მოსაზრებაც, რომ ხშირად ჯოხის გადატეხა ხდება პოლიციის რიგით ოფიცერზე... რამდენად გრძნობენ ეს ადამიანები თქვენი, როგორც მინისტრის მხარდაჭერასა და ზურგს?


- რიგ შემთხვევაში იყო შეკითხვები, როგორ გაიგებენ და შეხვდებიან ამას პოლიციელები?! პასუხი მარტივია. ამ უწყებაში მუშაობს ძალიან ბევრი კეთილსინდისიერი ადამიანი. დარწმუნებული ვარ, მათ თუნდაც ეს ჰაშთაგი ძალიან გაუხარდათ. ამაში ღრმად ვარ დარწმუნებული. ყველაფერთან ერთად, ეს ჩვენთვის იყო შიდა კომუნიკაციის ძლიერი მესიჯი. ჩვენ უნდა მივიდეთ იქ, სადაც საპოლიციო სისტემა იქნება ერთ-ერთი ყველაზე პრესტიჟული, ყველაზე ეფექტური და ყველაზე საპასუხისმგებლო სისტემა. ჩვენს თანამშრომლებთან გვაქვს რამდენიმე ფუნდამენტური თხოვნა - იყვნენ კეთილსინდისიერები და აქტუალურები. ამ პირობებში მივყვებით ბოლომდე, სადაც არ უნდა დასჭირდეთ მხარდაჭერა. ის, რომ ვიღაც მაღალჩინოსნის ბრალეულობა გადატყდება რიგით თანამშრომელზე, წარმოუდგენლად მიმაჩნია. გულწრფელად გეუბნებით.


- შსს-ში მოსვლისთანავე არაერთი რეფორმა დააანონსეთ, თუმცა საინტერესოა, ძირითადად მაინც რის შეცვლას აპირებთ?


- რეფორმების ძირითადი მიზანია, რომ შინაგან საქმეთა სამინისტროსა და მისი ქვედანაყოფების ეფექტიანობა გაიზარდოს. პირველ რიგში, ჩვენ ვიწყებთ კრიმინალური პოლიციის რეფორმას და რატომ? იმიტომ, რომ კრიმინალური პოლიციისთვის ხელი არავის უხლია საბჭოთა კავშირის შემდეგ. ასევე, ვაგრძელებთ რეფორმებს საპატრულო პოლიციაში. იქ გატარდა რეფორმები, შეიცვალა ფრონტი, ანუ სახე, მაგრამ ბექში არაფერი შეცვლილა.


- რა იგულისხმება ბექში?


- ძირითადად შიდა პროცესები. პატრულის თანამშრომელი არის თანამედროვე სტანდარტების შესაბამისი ჩვენი თანამოქალაქე, მაგრამ, როდესაც მიხვალთ ე.წ. მე-12 ოთახში, თავი საბჭოთა კავშირში გეგონებათ. ეს არის სწორედ ბექი... საპატრულო პოლიცია არის გარკვეულწილად საპოლიციო სერვისებზე დაფუძნებული დეპარტამენტი, შესაბამისად, ავტომატიზაციის დონეზე უნდა იყოს ყველაზე მაღალი. დაახლოებით ორ თვეში ამ მიმართულებით სასიამოვნო სიურპრიზსაც გპირდებით.


- თქვენი უწყების მიერ გამოქვეყნებული სტატისტიკაც მოწმობს, რომ ქვეყანაში კრიმინალის დონე გაზრდილია... ჩვენ ვხედავთ ყოველდღიურად საკმაოდ მძიმე დანაშაულებს, მათ შორის სიცოცხლის წინააღმდეგ მიმართულ დანაშაულებს... როგორ აპირებთ ამ სტატისტიკის შემცირებას?


- სტატისტიკის გამოქვეყნება ჩვენთვის არის პრინციპულად მნიშვნელოვანი. ეს გვეხმარება პრობლემის დანახვაში და რეფორმების სწორად დაგეგმვაში. სიცოცხლის წინააღმდეგ მიმართულ დანაშაულებში გარკვეულ პუნქტებზე მატებაა, გარკვეულ პუნქტებზე - კლება. ბოლო რამდენიმე წლის მაჩვენებლები რომ შეადაროთ, ნახავთ, რომ 2017 წელს მკვლელობების ნაწილში ქვეყანა პირველად ჩამოსცდა სამნიშნა ნიშნულს და მკვლელობის 100-ზე ნაკლები ფაქტი დაფიქსირდა. ცივი იარაღი, სხეულის განზრახ მძიმე დაზიანება, ოჯახში ძალადობა - ამ მიმართულებით მატება ნამდვილად გვაქვს და ცხადია, სწორედ აქეთკენ განსაკუთრებით იქნება ჩვენი ყურადღება მიმართული. მათ შორის ეს უკავშირდება სწორედ კრიმინალური პოლიციის რეფორმას. მოკლევადიანი შედეგის მისაღწევად არ ვდგამთ ნაბიჯებს. ჩვენი მუშაობა ინსტიტუციონალური გაძლიერებისკენ არის მიმართული. ამის შედეგებს საზოგადოება დაინახავს.

 

- თქვენი ინიციატივით მკაცრდება კანონი ქურდული სამყაროს წინააღმდეგ... რატომ გახდა ეს აუცილებელი და ხომ არ უკავშირდება საკანონმდებლო ცვლილებები იმ ფაქტს, რომ ბოლო პერიოდში არაერთი „კანონიერი ქურდი" პირდაპირ სასამართლო დარბაზიდან გათავისუფლდა, მიუხედავად იმისა, რომ ისინი „კანონიერ ქურდობას" არ უარყოფდნენ?


- ეს არის კარგი მაგალითი იმ ინსტიტუციონალური მიდგომისა, რაზეც უკვე გესაუბრეთ. კანონი, რომელიც დღეს მოქმედებს, მიღებულია 2005 წელს და ცხადია, რეალობა შეცვლილია. ტექნოლოგიის დონეზეც კი. შორი მანძილიდან დანაშაულებრივი სამყაროს მართვა ცოტა უფრო ადვილი გახდა. გარდა ამისა, სასამართლო დღეს მტკიცებულებების სრულიად სხვა სტანდარტს ითხოვს. როდესაც მოსამართლეები შინაარსობრივად კითხულობენ 2005 წელს მიღებულ კანონს, მაღალი სტანდარტის პირობებში მოხდა გამამართლებელი განაჩენების დადგომა.

 

- თუმცა წინა წლებში იგივე კანონს იგივე მოსამართლეები სრულიად სხვაგვარად კითხულობდნენ...


- გეთანხმებით. ამ და კიდევ სხვა ბევრ კანონს კითხულობდნენ სხვანაირად. ეს არის ზუსტად სტანდარტის ცვლილება. როდესაც სახელმწიფო ხდება უფრო ჰუმანური, რა თქმა უნდა, ინსტიტუციების ეფექტიანობა უნდა გაიზარდოს. ჩვენ არ მივდივართ რეპრესიული გზით, რადგან ამ შემთხვევაში წავიდოდით ისევ იგივე წრეზე და ეს პროცესი არასდროს დასრულდება. ჩვენ ჰუმანურობის პრინციპის პარალელურად უფრო ეფექტურს ვხდით ქურდულ სამყაროსთან ბრძოლას. ამ პროექტით იზრდება სტანდარტიც და ქურდულ სამყაროსთან დაკავშირებული დასჯადი ქმედებების ცნებაც უფრო გაფართოვდა.

 

- თქვენი უწყება საზოგადოებას პერიოდულად აწვდის ინფორმაციას ამოღებული ნარკოტიკებისა და ნარკოდანაშაულის შესახებ... საკმაოდ დიდ ოდენობებზეა საუბარი, შესაბამისად, საინტერესოა, რამდენად სერიოზულია ეს პრობლემა?


- პრობლემა სერიოზულია და არა მხოლოდ საქართველოსთვის. ეს უფრო გლობალური პრობლემაა. რაც შეეხება ნარკოპოლიტიკას, ამასთან დაკავშირებით შემიძლია გითხრათ, რომ ჰუმანიზაცია არის სწორი მიმართულებით გადადგმული ნაბიჯი, მაგრამ ძალიან მკაცრად უნდა ვუყუროთ, რომ ეს ჰუმანურობა არ იქცეს წახალისებად.  

 

- ბოლო პერიოდის რამდენიმე გახმაურებულ საქმეზეც მინდა გკითხოთ... მაგალითად, გენერალ სამსონ ქუთათელაძის მკვლელობა, დოდო გუგეშაშვილის ოჯახზე შეიარაღებული თავდასხმა... ამ რეზონანსულ საქმეებზე გამოძიების შედეგები დღემდე უცნობია... შეგიძლიათ, გვითხრათ, რა ეტაპზეა ძიება?


- გუგეშაშვილის საქმეზე გამოძიება ძალიან აქტიურ ფაზაშია. ვერსიების დიდი სიმრავლეა, თუმცა გამოძიების ინტერესებიდან გამომდინარე, დეტალებზე ვერაფერს მოგახსენებთ. გაცილებით წინ ვართ წასული სამსონ ქუთათელაძის საქმეში. ვფიქრობ, აქ შედეგი გონივრულ ვადაში დადგება.

 

- თქვენი ოპონენტებიც კი ამბობენ, რომ ამ ეტაპზე გახარია არის ერთადერთი მინისტრი, რომელიც ადეკვატურად პასუხობს არსებულ გამოწვევებს... თქვენ რას იტყვით, როგორ წარმოგიდგენიათ პოლიტიკურ ოპონენტებთან საუბარი?


- ჩვენს გუნდში ბევრი ღირსეული ადამიანი და მაღალი დონის პროფესიონალია. ჩვენს უწყებას რაც შეეხება, გვაქვს მიზანი, რომ ვიყოთ მაქსიმალურად ღია ნებისმიერი დაინტერესებული ჯგუფისთვის. ამას არ ვაკეთებთ იმიტომ, რომ ვინმეს მოვეწონოთ. არ გვეშინია არავისთან დისკუსიაში შესვლა რამდენიმე კრიტიკულად მნიშვნელოვანი პრინციპის გამო: მუშაობას ვაწყობთ პროფესიონალიზმისა და კეთილსინდისიერების საფუძველზე. ვიღაცასთან რაიმე საკითხში პაექრობისას შეიძლება წავაგოთ, მაგრამ ამის აღიარებაც არ შეგვეშინდება. წარმოუდგენლად მეჩვენება, რომ სუბიექტური მიზეზების გამო არ შევიდეთ დისკუსიაში იქ, სადაც სიმართლე ჩვენს მხარესაა. ეს უწყება იქნება მაქსიმალურად ღია და ვისაც სურვილი ექნება, შეუძლია დისკუსიაში შემოსვლა. ჩვენ არ გვეშინია ღიაობის და არ გვეშინია დისკუსიის. საქართველოს მსგავს პატარა ქვეყანაში მართლწესრიგის დამყარება არ არის კატასტროფულად რთული ამოცანა, მაგრამ კრიმინალთან ბრძოლაში თუ ადამიანის უფლებების ნაწილი ხელიდან გაგვექცა, ეს გახდება ჩვენი ყველაზე სუსტი წერტილი. სწორედ ამიტომ შეიქმნა ადამიანის უფლებების დეპარტამენტი და ვგეგმავთ მთელ რიგ ცვლილებებს. ორგანიზებული დანაშაულის დამარცხებას ფასი აქვს მხოლოდ მაშინ, თუ ადამიანის უფლებების სტანდარტი იქნება დაცული.

 

- დაბოლოს გკითხავთ... პოლიტიკურ კულუარებში თქვენი კანდიდატურა მომავალ პრემიერადაც განიხილება... რამდენად რეალურია ეს ხმები?


- გულწრფელად გეტყვით, რომ დღეს უფრო საინტერესო სამსახური ჩემთვის არ არსებობს და აგიხსნით, რატომ. ჩვენი ქვეყანა კი არის უსაფრთხო, მაგრამ რეგიონი ხდება ძალიან გამომწვევი.


- რას გულისხმობთ?


- თუნდაც იმას, რომ საზღვრის დაცვა ხდება კრიტიკულად მნიშვნელოვანი.


- ტერორიზმის საფრთხესაც გულისხმობთ?


- მათ შორის ამასაც. ჩვენს მეზობელ ქვეყნებში ტურბულენტობა საკმაოდ მაღალია. ვგულისხმობ ნარკოდანაშაულსაც. რუკას რომ შეხედოთ, საქართველოში ნარკოტრაფიკის ორი წყაროა - ირანი, საიდანაც შემოდის „ჰეროინი", და თურქეთი, საიდანაც შემოდის ქიმიური ნარკოტიკები. შარშან ამ დროს, ირანიდან საქართველოში იყო სამი რეისი, წელს იქნება პლუს ათი. არის ეს გამოწვევა? რა თქმა უნდა, კი. რეგიონში უსაფრთხოების მოთხოვნა სულ უფრო და უფრო პრიორიტეტული და მოთხოვნადი გახდება და ეს უნდა იყოს ჩვენი კონკურენტული უპირატესობა. ეკონომიკურად განვითარებული ქვეყანა, დასავლური ინსტიტუტებით, დასავლური ფასეულობებითა და უსაფრთხოების მაღალი სტანდარტით - ეს არის ჩემი და ჩემი თანაგუნდელების მთავარი მიზანი. მხოლოდ ამ შემთხვევაში იქნება ჩვენი ქვეყანა წარმატებული და სასურველი ადგილი, როგორც სტუმრებისთვის, ისე ჩვენი შვილებისთვის.

 

- და მაინც გკითხავთ - გამორიცხავთ პრემიერ-მინისტრობას?


- რა თქმა უნდა.


 

ავტორი: მირიან ბოქოლიშვილი



 

წყარო : wyaro
big_banner
არქივი