„მინდა ფსევდოლიბერალებს ვუთხრა, ყველაზე ლიბერალური მემარცხენეც კი NBC, CNN, საიდანაც მაგალითად ღვთისმშობელზე შეუძლიათ აგდებულად ლაპარაკი, არ მინახავს. დასავლეთში ეს არ არის მიღებული“, – ამის შესახებ საქართველოს ექს-პრეზიდენტმა მიხეილ სააკაშვილმა გადაცემა „კვირის აქცენტებში“ განაცხადა.

სააკაშვილმა გიორგი გაბუნიას სიტყვით გამოსვლა შეაფასა და დასძინა, რომ ასეთ სენსიტიურ თემებზე საუბარი ჟურნალისტის მხრიდან „პროვინციალიზმია“.

მისივე თქმით, ყველა ადამიანს აქვს გამოხატვის თავისუფლება მაგრამ წყევლა-კრულვა მიუღებელია.

„ყველა აზრის გამოხატვას ვცემ პატივს. ყველა ადამიანს აქვს თავისი გრძნობები. ყველა ადამიანს აქვს გამოხატვის თავისუფლება და კატეგორიულად მიუღებელია წყევლა-კრულვა, მათ შორის რელიგიური პირების მხრიდან, მაგრამ ერთი რამ ნათელია, მინდა ფსევდოლიბერალებს ვუთხრა, ყველაზე ლიბერალური მემარცხენეც კი NBC, CNN, საიდანაც მაგალითად ღვთისმშობელზე შეუძლიათ აგდებულად ლაპარაკი, არ მინახავს. დასავლეთში ეს არ არის მიღებული. ჰოლანდიაში, რომელიც ძალიან ლიბერალური ქვეყანაა, ეს მიღებული არ არის და მიმაჩნია, რომ ცოტა ამაში გადაჭრა, მიუხედავად იმისა, რომ ძალიან ნიჭიერი ხალხი აკეთებს ამას, ცოტა პროვინციალიზმია.

არსად არ არის, მაგრამ ჩვენ ქართველებს გვაქვს რაღაც, მოდით დავფიქრდეთ, თუ ჰოლანდიაში და ამერიკაში არ არის, შეიძლება საქართველოშიც არ არის ამის ადგილი“, -აცხადებს სააკაშვილი.