logo_geo
„აქცია გაუთხოვრებზე განახლდება ხვალიდან...“
- +

12 ივლისი. 2018. 23:33

 

 

53 წლის ლევან მახარაშვილმა სახელი ფასდაკლების აქციით გაითქვა: ის გაუთხოვარ ქალებს საზამთროს ყიდვას 50%-იანი ფასდაკლებით სთავაზობდა. ლევანს რუსთავის ე.წ. სტამბოლის ბაზარში მივაგენით. „გაუთხოვრებზე ფასდაკლება გაგრძელდება ხვალიდან“ - ამჯერად, ასეთი წარწერით დაგვხვდა... გაირკვა, რომ გაუთხოვრები მომხმარებელთა ერთადერთი სეგმენტი არაა, რომელზეც ლევანი ზრუნავს: ერთი პერიოდი, 2 კილოგრამ ვაშლს ნებისმიერი კატეგორიის მომხმარებელს უფასოდ ურიგებდა, თუმცა ფაქტია - დღეს ქალების ინტერესებზე განსაკუთრებულად ზრუნავს. გასაყიდი პროდუქტის კონსულტანტიც თავად არის, მოლარეც, PR-ისა და მარკეტინგის მენეჯერიც...


- ხალხი სულ დაღონებული სახით დადის. გაივლიან, გამოივლიან, თავ-პირი ჩამოსტირით, დაღვრემილები არიან. ვიფიქრე, რაღაც ისეთი გამეკეთებინა, რომ გასცინებოდათ. ჰოდა, საზამთროებთან წარწერა დავდე. როცა ხედავენ, სიცილით კვდებიან. მერე მეუბნებიან, - მეზობელი, ახლობელი მყავს გაუთხოვარიო. ზოგი ამბობს, - გაუთხოვარი ვარ, ფასი დამიკელიო, მაგრამ მე „გაუთხოვრობის“ ცნობებს ვთხოვ. მერე ზოგი მეუბნება, - უი, მეხი კი დაგეცეს, რა მითხარიო!..

 


- ანუ თქვენი ფასდაკლება რეალურად არ მოქმედებს?


- რეალურად, თუ მართლა ძალიან გაუთხოვარი იქნება, სულ ვაჩუქებ საზამთროს.

 


- გაუთხოვრობის ასაკი საიდან იწყება?


- 50-60-დან, როცა უკვე იმედგადაწურულია, მაგრამ ქალებს ასაკს რომ ვეკითხები, ძირითადად, წლებს არ აღიარებენ - ნაკლებს მეუბნებიან. ერთმა მკითხა, - გაუთხოვრობის ცნობა სად ავიღო, საიდან მოვიტანო, ქალთა კონსულტაციაში ხომ არ წავალო?! აქაც გვაქვს ოთახი, სადაც შევამოწმებთ... დღეში 50-100 ქალიც რომ გავაცინო, ჩავთვლი, რომ რაღაც კარგი გავაკეთე - ქალები გავაღიმე.


- დღეს გიწერიათ, - აქცია გაუთხოვრებზე ხვალიდან განახლდებაო. რა ხდება?


- ერთი დღით შევწყვიტე. დასვენების დღე მაქვს. ძალიან ბევრი გაუთხოვარი მოგვაწყდა. ყოველი მესამე მეუბნება, - გაუთხოვარი ვარ, ფასი დამიკელიო.


- შემოწმებას ვეღარ აუდიხართ?


- არა. მართლა ხომ არ შევამოწმებ?! ვინ შემამოწმებინებს, სად მაქვს მაგის იღბალი, მაგის სიამოვნება?..

 

 

- კაცებისთვის ფასდაკლებები არა გაქვთ?


- კაცები მოდიან და მეუბნებიან ხოლმე, - უცოლო კაცებზე რა აქცია გაქვთო? ვპასუხობ, - პანღური უკანალში-მეთქი. ქვრივებთან დაკავშირებითაც არის კითხვები, მაგრამ ქვრივი მეც ბევრი მყავს სარჩენი...


- სოციალურ ქსელში თქვენ შესახებ იმასაც წერდნენ, - ამ აქციით თავისთვის საცოლეს ეძებსო...


- არა, ცოლი მყავს. ჩემი მეუღლე VI კლასში იყო, მე - X-ში, როცა ერთმანეთი გავიცანით. მაგრად მიყვარს! 2 შვილი - ბიჭი და გოგო გვყავს. დაოჯახებულები არიან, შვილებიც ჰყავთ. კარგი ოჯახი მაქვს. არაფერს ვემდური, თითქმის ყველაფერი მაქვს: სახლი, კარი, მანქანა...


- დიდი ხანია, საზამთროს ყიდით?


- ერთ-ერთ სამსახურში ვიყავი. დაახლოებით, 2004 წელს გამოგვიშვეს. უმუშევრი დავრჩი. ვაჭრობა დავიწყე. ამ ადგილას მოვედი - ვყიდულობ და ვყიდი... ზამთარში ვაშლს ვყიდი, ზაფხულში - საზამთროს. სხვა რაღაცების გაყიდვა არ ვიცი. რამდენჯერმე ვცადე კიტრის, პომიდვრის გაყიდვა, მაგრამ არ გამომივიდა, საზამთროს იყიდი, დადებ, აწონი... ადვილია, რა! ცოტათი ძნელი საქმე არ მიყვარს.


- საზამთროები საიდან მოგაქვთ?


- ეს უზბეკეთიდანაა შემოტანილი. თურქული და ირანულიც არის... თვის ბოლოს ქართულიც გაიყიდება.


- როგორ ამოწმებთ, საზამთრო კარგია თუ ცუდი?


- ქალი რომ გაივლის, ხომ იტყვი ადამიანი, - რა კარგი ქალიაო? საზამთროს შემთხვევაშიც დაახლოებით, ასეა, ოღონდ ამას ხელსაც წამოარტყამ - თუ კარგი ხმა აქვს, ე.ი. კარგია.


- დღეში დაახლოებით რამდენი კლიენტი გყავთ?


- 50-100. კმაყოფილი ვარ. საერთოდ, ადამიანმა ცხოვრებაში სულ დადებითი უნდა ეძებო. თუ დადებითი პიროვნება ხარ, ყველაფერი დადებითად გექნება - ვაჭრობაც, საჭმელიც, სასმელიც... უარყოფითად განწყობილი ადამიანი ყველაფერში უარყოფითს ეძებს და პოულობს კიდეც. ხომ ცოდოა?.. უნდა ეცადო, სხვაც გაამხიარულო. მაგალითად, ჩემი წარსულიდან დღემდე ბევრი გოგო და ქალი მყავს გამხიარულებული.


- რას გულისხმობთ?


- გაცინებულს. თქვენც ხომ იცინით?.. რავი, რითიც შემეძლო, გოგონებს მხარში ვედექი - სულიერად, მორალურად, ფიზიკურად.


- გასაგებია. თქვენმა აქციამ გაყიდვებზე დადებითად იმოქმედა?


- გაყიდვებზეც დადებითად იმოქმედა და ჩემს ფოტოს პირველ დღეს "ფეისბუკზე" 800 მოწონება და 220 კომენტარი ჰქონდა. დღეში 1000 ადამიანის აქტიურობა ნორმალურია. მეტის ღირსი ვარ, მაგრამ არა უშავს.


- პიარისა და მარკეტინგის საზაფხულო კურსის გახსნასაც ხომ არ გეგმავთ?


- არა, უბრალოდ, მინდოდა, საზოგადოებაში დადებითი მუხტი შემეტანა. გაივლიან, გამოივლიან, საზამთროს საცოდავი მზერით უყურებენ. საშუალება არა აქვთ, რომ იყიდონ. წარწერა მაინც წაიკითხონ და გაიცინონ... საზამთროს გაყიდვაზე მეტად ის მიხარია, რომ იცინიან და მხიარულობენ. ერთმანეთს ეუბნებიან ხოლმე: - ნახე, გოგო, რა წერიაო?.. სოციალურ ქსელში, ჩემ შესახებ ზოგმა უარყოფითი კომენტარიც დაწერა: - ცოტათი უხეში კაციაო. კი, ხანდახან ასეთიც ვარ.


- მაშინ, როცა მომაბეზრებელი კლიენტი გსტუმრობთ, თუ?..


- ჰო, ზოგი მართლა ყველანაირად უარყოფითი პიროვნებაა, ინტრიგანობს. ასეთ რაღაცებს ვერ ვპატიობ. წლების განმავლობაშიც ისეთი სამსახური მქონდა, რომ წესრიგი, კულტურა, სილამაზე მიყვარს. არასწორი საქციელი არ მომწონს.


- საზამთროსთან დაკავშირებული პრეტენზიებით - მაგალითად, ტკბილი არ იყოო, - არ გაწუხებენ?


- ძირითადად, ამ საკითხს იუმორით უდგებიან. ისე, მორიდებით მეუბნებიან ხოლმე, - კარგი არ იყოო. მერე მეც ზოგს შევუცვლი ან დანაკლისის სხვაგვარ კომპენსირებას ვახდენ, მაგალითად - 8 ლარის ნაცვლად, 5-ს ვახდევინებ. როცა საზამთრო არ გამოადგებათ, მაინც ჩემთან მოდიან. ძალიან ბევრს ვუყვარვარ.


- მყიდველს საზამთროს გასასინჯად ადგილზევე უჭრით?


- კი. მეზარება, მაგრამ ვუჭრი, რა თქმა უნდა.


- ვაშლზე რა ფასდაკლებები გაქვთ ხოლმე?


- იქაც მსგავსი მასხარობები. მაგალითად, ერთხელ გორში, ერთი კაცისგან ვაშლი ვიყიდე. რომ გამოვდიოდი, დავინახე, კართან 7 ყუთი წვრილი "გოლდენი" ეწყო. იმ კაცს ვუთხარი: - მაიტა, ეს 7 ყუთი ვაშლი მაჩუქე, მაინც წვრილია-მეთქი. გამომხედა და მითხრა: - კი, ბატონო, გაჩუქებ, მაგრამ რუსთავში რომ ჩაიტან, შენც აჩუქე ხალხსო. - დედას გეფიცები, ვაჩუქებ-მეთქი, - დავპირდი. ჩამოვიტანე, 7 ყუთი ვაშლი ცალკე დავაწყვე და მივაწერე: "2 კგ უფასოდ". უამრავი ხალხი მოდიოდა. ზოგი მეუბნებოდა, - 3 კილო მომეცი, მაინც უფასოაო. ვპასუხობდი, - არა, ქალბატონო, ეს ყველას უნდა შეხვდეს-მეთქი... მთელი წელი და მერეც ხალხი მოდიოდა - იმ კაცისგან ვიყიდოთ, უფასო ვაშლს რომ "ყიდისო". იმ შვიდმა ყუთმა ვაშლმა ისეთი რეკლამა გამიკეთა, რომ მთელმა ქალაქმა შეიტყო - სტამბოლის ბაზარში ვიღაც კაცი ხილს უფასოდ "ყიდისო". ყველა ჩემკენ გამორბოდა. ვინც წაიღო, წაიღო, მაგრამ სხვებიც ხომ ხედავდნენ? ზოგს არც სჯეროდა, რომ 2 კილოგრამ ვაშლს ხალხს უფასოდ ვატანდი. ასეთი რაღაცები მეხერხება.


- სამუშაო დღეს როდის იწყებთ და ასრულებთ?


- დილის 8-დან საღამოს 7-მდე ვმუშაობ.


- სინამდვილეში, საზამთროთი ვაჭრობა შრომატევადი საქმეა?


- კი, ძალიან. მაგალითად, მთელი დღე უნდა ალაგო, აწონო, გაყიდო, მანქანიდან გადმოტვირთო, შეტვირთო... თუ კლიენტი არ გყავს და დღეში 5 ადამიანს ემსახურები, არაფერია, მაგრამ თუ სერიოზულად მუშაობ, ძალიან დამღლელია.


- შემოსავლიანია?


- კი, ოჯახს ვინახავ.


- სამუშაოს დასრულების შემდეგ რას აკეთებთ, როგორ ერთობით?


- დროს ოჯახთან ერთად ვატარებ. ბავშვები პარკში სასეირნოდ მიმყავს... იშვიათად ქალაქგარეთაც გამყავს: მაყალი, მწვადი...


- შვილები არ გეხმარებიან?


- კი, დილით ჩემი ვაჟი მეხმარება. მერე მასაც თავისი საქმე აქვს...


- უკვე ძალიან პოპულარული ხართ. ხალხი ავტოგრაფს არ გთხოვთ?


- კი, მაშაყირებენ - თქვენი ავტოგრაფი გვინდაო. ძირითადად, წარწერებს ფოტოებს უღებენ. ვინც ფოტო გამივრცელა, არც ვიცოდი, თუ გადამიღო. მოვიდა და მკითხა: შეიძლება, გადავიღოო? - გადაუღე-მეთქი. კამერა აუწევია და კადრში მეც გამომაჩინა. რაკი გამოაქვეყნა, იყოს, არა უშავს...


- პოპულარობა მოგწონთ?


- კი, ნორმალურია. ასეთ ამპლუაში წინათაც ვყოფილვარ - ზვიად გამსახურდიას პერიოდში, მიტინგზეც გამოვსულვარ და ჩემ შესახებ უთქვამთ, - აუ, ეს ის ტიპიაო... ყველას მხარს ვუჭერ, ვინც ქართული სახელმწიფოს მხარდამჭერია. ისე, აპოლიტიკური ადამიანი ვარ.


- წარმოშობით საიდან ხართ?


- გორიდან, მაგრამ რუსთავში ვცხოვრობ. არ ვემდური, კარგი ქალაქია. ადრეც კარგი იყო... იცი, რატომ? ძირითადად, რუსთავში მშრომელი, მუშა ადამიანები ცხოვრობენ. აქ სულ სხვა გულის ხალხია...


- წყალდიდობას როგორ გაუმკლავდით?


- მაშინაც ვიხალისეთ. აქ ვიყავი. საერთოდ, წვიმა, წყალდიდობა, მსგავსი რაღაცები მიყვარს, რადგან ზოდიაქოს ნიშნის მიხედვით, ჩემი სტიქია წყალია. კი, ქუჩები დაიტბორა, ის ხალხი ცოდოა, ვინც დაზარალდა, მაგრამ არა უშავს, ამ პრობლემასაც მიეხედება.
- თქვენი საზამთროები წყალდიდობას უვნებლად გადაურჩნენ?


- რა მოუვიდოდა? საზამთროები ზემოთ იყო.


- აქციების შესახებ კრეატიული იდეები როდის, როგორ მოგდით?


- მაგალითად, რაც ახლა მეწერა - "გაუთხოვრებზე 50%-იანი ფასდაკლება", მაშინ დამებადა, როცა ერთი ქალბატონი მოვიდა და საზამთროზე ფასის დაკლება მთხოვა. 13 ლარი და 60 თეთრი ჯდებოდა. ვუთხარი, - 60 თეთრს დაგიკლებ-მეთქი. - არა, გაუთხოვარი ვარ, ფული არ მაქვს და გაითვალისწინეო, - მიპასუხა. მერე 10 ლარში ვაძლევდი და ისევ შემახსენა: - გაუთხოვარი ვარ, კიდევ დამიკელიო. - ძალიან ბევრს მაკლებინებ-მეთქი. - ხომ გითხარი, რომ გაუთხოვარი ვარ და ფული არა მაქვსო?! - გამიმეორა. - რაკი გაუთხოვარი ხარ, ნახევარ ფასად გაგატანო-მეთქი? - ვუთხარი. მაშინ მომივიდა ამ ცნობილი აქციის იდეა და მივაწერე კიდეც: "გაუთხოვრებზე 50%-იანი ფასდაკლება".


- რამდენკილოგრამიან საზამთროს გთხოვდათ ფასდაკლებით?


- კაი დიდი უნდოდა, 15-კილოგრამიანი! ძალიან ბევრს ითხოვდა...


- სამომავლოდ, როგორი ფასდაკლებების აქციებს გეგმავთ?


- მოკლეკაბიანებზეც გვექნება, განათხოვრებზეც... რაღაცას მოვიფიქრებ, ისინიც რომ გავახალისო...

 

 

წყარო : wyaro
big_banner
არქივი