logo_geo
ქეთევან ღოლიჯაშვილი: მივმართავ ყველა დედას, ვის შვილსაც ენდოკრინოლოგმა ირაკლი ფაღავამ ადრენოგენიტალური სინდრომის კლასიკური ფორმის დიაგნოზი დაუსვა - სასწრაფოდ დამიკავშირდით!
- +

29 მაისი. 2019. 16:51

 

საყოველთაოდ ცნობილი ფაქტია - დღეისათვის ქართველი ექიმების მიმართ პაციენტებმა ნდობა დაკარგეს. ამის საფუძველს იძლევა არაერთი მცდარი დიაგნოზი და საბედისწერო სამედიცინო შეცდომა, რომელსაც უამრავი ადამიანის, მათ შორის, ბავშვების სიცოცხლე და ჯანმრთელობა შეეწირა. სამწუხაროდ, ამბავი, რომელიც პატარა მარიამ შიოლაშვილს გადახდა თავს, კიდევ უფრო აღრმავებს უნდობლობას ჯანდაცვის სისტემისა და პირადად მინისტრ დავით სერგეენკოს მიმართ. „ასავალ-დასავალს“ მომართა 41 წლის ქეთევან ღოლიჯაშვილმა, რომელიც აცხადებს, რომ მისი შვილი - 2 წლის მარიამ შიოლაშვილი ენდოკრინოლოგ ირაკლი ფაღავამ არასწორი დიაგნოზის დასმით და არასწორი მკურნალობით სამუდამოდ ინვალიდობისთვის გაწირა.

 

ქალბატონო ქეთევან, ძალიან აღელვებული ბრძანდებით! რა შეემთხვა თქვენს შვილს და რაში ადანაშაულებთ ცნობილ ენდოკრინოლოგს?

 

- უპირველეს ყოვლისა, მინდა, უდიდესი მადლობა გადავუხადო თქვენს გაზეთს. „ასავალ-დასავალი“ იყო ყოველთვის პირველი, რომელიც უშიშრად ლაპარაკობდა სიმართლეს. თქვენი ერთგული მკითხველი ვარ, შესაბამისად, შესისხლხორცებული მაქვს, რომ არ უნდა შემეშინდეს სიმართლის ხმამაღლა თქმის და უნდა ვიბრძოლო უკანასკნელ ამოსუნთქვამდე, რათა ეს შემზარავი სიმართლე რაც შეიძლება ბევრმა ადამიანმა გაიგოს! მინდა, მივმართო ყველა მშობელს, რომელთა შვილები მავანის უცოდინრობას, გამიზნულ ექსპერიმენტებსა და ჯანდაცვის სამინისტროს გულგრილობას ეწირებიან!

 

თქვენი გაზეთის არსებობამ შემმატა ძალა, სანამ პირში სული მიდგას, ფარ-ხმალი არ დავყარო! რომ არა ღვთის ნება, დღეს ჩემი შვილის ჯანმრთელობა განადგურებული იქნებოდა. მთელი ჯანდაცვის სისტემა მებრძვის, მიუხედავად იმისა, რომ რეგულირების სააგენტომ დაამტკიცა ექიმ ირაკლი ფაღავას ბრალეულობა, თუმცა, მის მიმართ მხოლოდ წერილობითი გაფრთხილებით შემოიფარგლნენ. მაინც არ ვჩერდები, საქმე პროკურატურაშია, მიმდინარეობს სასამართლო პროცესები, რათა ახლა უკვე სხვისი შვილები გადავარჩინო, რომელთაც ასევე არასწორი დიაგნოზი დაუსვეს. შესაბამისად, არასწორი მკურნალობა - ჰორმონოთერაპია აქვთ დანიშნული, რომელიც ანადგურებს მათ ჯანმრთელობას და საფრთხეს უქმნის სიცოცხლეს!

 

- დავიწყოთ თავიდან... რატომ მოხვდით ენდოკრინოლოგ ირაკლი ფაღავასთან და რა დიაგნოზი დაუსვეს თქვენს ქალიშვილს?

 

2017 წლის 19 აპრილს შემეძინა გოგონა მარიამ შიოლაშვილი, ბუნებრივი მშობიარობით, დაიბადა 4200 გრამი დიდი ხნის ნანატრი, ჯანმრთელი გოგონა. მშობიარობიდან 10 დღეში, სამშობიარო ტრავმებით გამოწვეული ტკივილების გამო, რძე შემიმცირდა, ხოლო დამატებით საკვებს ბავშვი ცუდად ჭამდა. შესაბამისად, წონაშიც ნაკლები მოიმატა, რაც პათოლოგიად არ ჩაუთვლია ჩვენი უბნის პედიატრს. ჯერ ერთი თვისაც არ იყო, რომ გაცივდა: ჰქონდა ცხვირიდან გამონადენი და ხველა. ავადმყოფობის მესამე დღეს დაფიქსირდა სიცხე - 37,5 გრადუსი, რის გამოც გამოვიძახე სასწრაფო და ბავშვი გადაყვანილ იქნა ციციშვილის სახელობის ახალი კლინიკის ნეონატოლოგიურ განყოფილებაში, სადაც 2 თვემდე ასაკის ბავშვებს მკურნალობენ. მარიამს ვირუსის მსუბუქი ფორმა აღმოაჩნდა, მაგრამ, რადგან 1 თვის განმავლობაში წონაში ნამატი მხოლოდ 270 გრ იყო, ეს პათოლოგიად მიიჩნია მორიგე ნეონატოლოგმა ქეთევან გველესიანმა და ამ მიზეზით დაგვტოვეს საავადმყოფოში. მითხრეს, რომ გამოსაკვლევი იყო ბავშვის უმადობის მიზეზი, არადა, ვირუსის სირთულე ჰოსპიტალიზაციას არ მოითხოვდა. მეორე დღიდან მარიამის მკურნალობა გააგრძელა ნეონატოლოგიური განყოფილების უფროსმა თამარ გოთუამ.

 

კლინიკაში წოლის მესამე დღეს, ვინაიდან მარიამმა ჭამას არ უმატა, გაგვიკეთეს შემდეგი ჰორმონების ანალიზი:17OH PROGESTERONE;CORTISOL და თავისუფალი ტესტოსტერონი. ასევე - ფარისებრი ჯირკვლის ჰორმონები. ამ ანალიზების შედეგებით დაგვისვეს დიაგნოზი: თირკმელზედა ჯირკვლის ქრონიკული უკმარისობა -ადრენოგენიტალური სინდრომის კლასიკური(მარილდამკარგავი) ფორმა -E25.0. დაავადება, რომელიც იწვევს ორსქესიანობას, როცა ქალისა და კაცის სასქესო ორგანო ერთდროულად აქვს ადამიანს ან სასქესო ორგანო იმდენად პათოლოგიური აგებულებისაა, რთულია სქესის გარჩევა.

 

- ვინ დაგისვათ ეს დიაგნოზი?

 

- დიაგნოზზე ეჭვი მიიტანა და კვლევები დანიშნა ნეონატოლოგმა თამარ გოთუამ, დიაგნოზი მეორე დღეს დაადასტურა ბავშვთა ენდოკრინოლოგმა ირაკლი ფაღავამ. დაგვინიშნეს ჰორმონული პრეპარატები კოტინეფი და კორტეფი, რომლებიც ბავშვს უნდა ესვა მთელი ცხოვრების მანძილზე.

 

- რა დაავადებასთან გქონდათ საქმე?

 

ადრენოგენიტალური სინდრომი (იგივე აგს) - გენეტიკური დაავადებაა. აღნიშნული სინდრომის კლასიკური მარილდამკარგავი ფორმა იწვევს ორსქესიანობას და თუკი  არ ხდება ჰორმონოთერაპია, სიცოცხლესთან შეუთავსებელი გახლავთ. ირაკლი ფაღავამ  მითხრა, რომ მეც და ჩემი მეუღლეც ამ დაავადების მატარებლები ვიყავით, ამიტომ ბავშვიც დაავადებული დაიბადა. აქვე დააყოლა - გაგიმართლათ, რომ ბავშვს მხოლოდ 1 სასქესო ორგანო აქვსო. რეალურად ამ დაავადებაზე ეჭვი მიიტანეს უმადობისა და ლაბორატორიული მონაცემების გამო. არადა, ჰორმონებს, რომლებიც დანიშნეს, წესით, მადის მომატება უნდა გამოეწვია, თუმცა, ბავშვმა საერთოდ უარი თქვა ჭამაზე, მხოლოდ ცარიელ ძუძუს წოვდა, რომელიც სრულიად გამიშრა ნერვიულობის გამო. გოთუას ვეუბნებოდი:- აქამდე, ასე თუ ისე, ჭამდა ბავშვი და ახლა რა ხდება-მეთქი? - დაავადება პროგრესირებსო, იყო პასუხი. კლინიკაში წოლისას ენდოკრინოლოგ ფაღავასაც ვკითხე - ყველაზე უარესს რას უნდა ველოდე-მეთქი? რაზეც მიპასუხა, რომ ნებისმიერი სტრესისგან, თუნდაც ხელი რომ მოეტეხა, მარილების სწრაფი დაკარგვის გამო ბავშვი შეიძლება მომკვდარიყო.

 

- როგორ შეიტყვეთ, რომ თქვენს შვილს მცდარი დიაგნოზი დაუსვეს?

 

ვინაიდან ბავშვს მთელი ცხოვრების მანძილზე უნდა ესვა წამლები, საავადმყოფოში მის დატოვებას აზრი აღარ ჰქონდა. თანაც მხოლოდ თვალისა და ცხვირის წვეთებს ასხამდნენ, ინჰალაციას უკეთებდნენ და ზონდით კვებავდნენ, შესაბამისად, ბინაზე გამოვეწერეთ ხელწერილით. რადგან ზონდიანი  ბავშვის გაწერის უფლება არ ჰქონდათ, ზონდს კი ვეღარ ვიღებდით, იქვე მოველაპარაკე ექთანს, ჩემთან ევლო სახლში და 3 დღეში ერთხელ ბავშვისთვის ზონდი შეეცვალა. ირაკლი ფაღავა მიმტკიცებდა, რომ წესით, ამ მკურნალობის ფონზე ბავშვს ჭამა უნდა დაეწყო, მაგრამ ამაოდ. ბოლოს ჩემი პირადი ენდოკრინოლოგისა და ერთ-ერთი პედიატრის რჩევით, გადავწყვიტე, ბავშვი მიმეყვანა ბავშვთა ენდოკრინოლოგ მარინა გორდელაძესთან, რომელმაც მიზეზთა გამო გადაგვამისამართა ბავშვთა ენდოკრინოლოგ ნინო აბდუშელიშვილთან. ისევ ციციშვილის კლინიკაში. ექიმმა გასინჯა ბავშვი, დაუთვალიერა სასქესო ორგანო და გვკითხა -საერთოდ, რატომ მიიტანეს ეჭვი ამ დაავადებაზეო? ქალბატონი ნინო ანალიზების პასუხებსაც გაეცნო და გვითხრა, რომ ბავშვს ყველა  მაჩვენებელი ნორმაში ჰქონდა. ვინაიდან ჰორმონების მოხსნა ერთბაშად არ შეიძლებოდა, ქალბატონმა ნინომ დოზები გაგვინახევრა, რის შემდეგაც, სულ რამდენიმე დღეში ბავშვმა ოდნავ უმატა ჭამას. ეს იყო იმ 3-კვირიანი ჯოჯოხეთის დასასრული, როცა ცოცხალი ბავშვი მატირეს. ასე რომ, ნინო აბდუშელიშვილი უფლის მიერ მოვლენილი ანგელოზია ჩვენი ოჯახისთვის. აკი, იმის ოცნებასაც ვერ ვბედავდი, რომ შეიძლებოდა, შვილი განკურნებულიყო. იმითაც კმაყოფილი ვიქნებოდი, რომ ეცოცხლა, თუნდაც სექსუალური გადახრები განვითარებოდა.

 

- ქალბატონო ქეთევან, თქვენი შვილი გადარჩა. რატომ გადაწყვიტეთ ბრძოლის გაგრძელება ჯერ ჯანდაცვის სამინისტროში, შემდეგ კი - პროკურატურაში?

 

დღეს სხვისი შვილების გადასარჩენად ვიბრძვი, რათა ექიმებს, რომლებიც ასე ეთამაშებიან ჩვენი პატარების სიცოცხლესა და ჯანმრთელობას, აღარასოდეს გაუჩნდეთ მსგავსი დანაშაულის ჩადენის სურვილი. მაგრამ აღმოჩნდა, რომ ჯანდაცვის სამინისტროში სრული განუკითხაობაა და საფუძვლიანი ეჭვი მაქვს, პირადად დავით სერგეენკო აფარებს ხელს ირაკლი ფაღავას! სავარაუდოდ, ამ ბავშვებზე ატარებენ კვლევებს და ჩვენს შვილებს საცდელ კურდღლებად იყენებენ! მოვითხოვ, მოძებნონ დანარჩენი ბავშვებიც და გადაამოწმონ, სჭირდებათ თუ არა მათ ეს მკურნალობა. ხელთ ჩამივარდა შემზარავი დოკუმენტაცია, რომლის გამოქვეყნების საშუალებაც არ მაქვს, თუმცა, ახლავე გაჩვენებთ! პროკურატურამ სრულად მოითხოვა ყველა დაავადებული ბავშვის მონაცემები, თუმცა, მათმა ადვოკატმა, მხოლოდ 6 ბავშვის  მონაცემები წარმოადგინა, რომელთაც ბოლო 5 თვის მანძილზე დაუსვეს აგს-ს დიაგნოზი. ამ დოკუმენტებში კარგად ჩანს, რომ აგს-ს დიაგნოზით დაავადებულ ექვსივე ბავშვს, რომელსაც ფაღავა ჰორმონებით მკურნალობს, ყველა მაჩვენებელი ნორმაში აქვს! 2 ბავშვის მონაცემები კი, რომელიც ჩვენთან ერთად იწვნენ კლინიკაში, საერთოდ გააქრეს. ასობით ბავშვს დაუსვა ეს დიაგნოზი ირაკლი ფაღავამ და მინდა, მათ მშობლებს ხმა მივაწვდინო - გადაამოწმონ დიაგნოზი, ნუ დაღუპავენ საკუთარ შვილებს. დიახ, მივმართავ ყველა დედას, ვის შვილსაც ენდოკრინოლოგმა ირაკლი ფაღავამ ადრენოგენიტალური სინდრომის კლასიკური ფორმის (E25.0) დიაგნოზი დაუსვა - სასწრაფოდ დამიკავშირდით! განყოფილების გამგე მეუბნებოდა, ძალიან იმატა ამ დაავადებამ ახალშობილებში და უკვე 15 პროცენტამდე ავიდაო. წარმომიდგენია, რამდენი ბავშვი გააუბედურეს და რამდენს დაუნიშნეს ორგანიზმის დამანგრეველი ჰორმონოთერაპია. ამ მანკიერ წრეს, რომელშიც  არაერთი ექიმია ჩართული, პირადად მფარველობს დავით სერგეენკო. ვიძლევი პირობას, რომ ეგენი ამ ამბავს შეეწირებიან. არ გავჩერდები! მაშინ მაინც მივაღწევ ჩემსას, ხელისუფლება რომ შეიცვლება და ახალ ხელისუფლებას ძველზე კომპრომატები დასჭირდება. სხვათაშორის, რაც ჩემი წერილი პირადად მინისტრს გაუგზავნეს, მას შემდეგ დაიწყო საქმის მიჩუმათება. მას შემდეგ შეიცვალა ექსპერტის ტონი, დამოკიდებულება და ურთიერთგამომრიცხავი დასკვნები დაიდო. თურმე, ჩემს შვილს ზიანი არ მიადგა არასწორი მკურნალობით. ენდოკრინოლოგ ფაღავას მისცეს საშუალება, გაეყალბებინა ჩვენი სამედიცინო ისტორია, თუმცა, მაინც ვერ დაიძვრინა თავი. თითოეული ჩემი სიტყვა გამყარებულია სამედიცინო ჩანაწერებით და ოფიციალური დოკუმენტაციით. ყველა იმ ტყუილის ჩამოთვლა, რაც გოთუამ და ფაღავამ იკადრეს, ძალიან შორს წაგვიყვანს.

 

- რა დასკვნა დადო თქვენი საჩივრის განხილვის შემდეგ სამედიცინო რეგულირების სააგენტომ?

 

დადგინდა, რომ ჩემი შვილი იყო ჯანმრთელი და არასწორი მკურნალობა უტარდებოდა. სამედიცინო რეგულირების სააგენტოს დასკვნა,  რითიც მტკიცდება ფაღავას შეცდომები, პრაქტიკულად, მუქარით დავაწერინე, რადგან უკვე 8 თვე იყო გასული და პასუხი არ ჩანდა. ერთ-ერთი სატელეფონო საუბრისას ჯანდაცვის წარმომადგენელს ვუთხარი, რომ თუ არასწორ დასკვნას დადებდნენ, ჩავიტარებდით  გენეტიკურ გამოკვლევას (აგს გენეტიკური დაავადებაა) და ყველა რეცენზენტს პასუხს ვაგებინებდი. გენეტიკური ანალიზი საქართველოში არ კეთდება და დაახლოებით 7000 ლარი ჯდება, თუმცა, ამ თანხის გადახდაზეც წამსვლელი ვიყავი. ამ ეპიზოდიდან დაახლოებით 1 თვეში რეგულირების სააგენტოს დასკვნა ფოსტით მომივიდა სახლში. დაავადებას ახასიათებს კვებისგან დამოუკიდებელი შადრევანისებური ღებინება, ორი სასქესო ორგანო და დაბალი წნევა, ჩვენს შვილს კი მსგავსი არაფერი ჰქონია! ექსპერტთა დასკვნაში პირდაპირ წერია, რომ „სამედიცინო დოკუმენტაციაში ნანახი ვერ იქნა ბავშვის სასქესო ორგანოების აღწერა! ამდენად გაუგებარია, რის საფუძველზე იქნა მიტანილი ეჭვი აგს-ზე და დაინიშნა 17 OHP-ის გამოკვლევა. ნებისმიერ სამედიცინო ლიტერატურაში მითითებულია, რომ 17OHP-ის განსაზღვრა ნაჩვენებია გარეგანი სასქესო ორგანოების არასწორი აგებულებით და ამ ფონზე გამოხატული მინერალოკორტიკოიდული უკმარისობის ნიშნების არსებობისას. არასწორი ჩვენებით განისაზღვრა 17OHP.მისი დონე 4,6 ნგ/მლ შეესაბამებოდა 1 თვის პაციენტის ასაკობრივ ნორმას (17OHP-ის მაჩვენებელი  ერთ თვემდე შეადგენს 2,4-16,8 ნგ/მლ,1-2 თვის ასაკში 1,6-9.7 ნგ/მლ). ცნობილია, რომ ახალშობილებს  17 OHP უფრო მაღალი აქვთ, იგი 2 თვის ასაკიდან ქვეითდება და, პრაქტიკულად უტოლდება პრეპუბერტეტულ ნორმას“.

 

- ქალბატონო ქეთევან, რა ზიანი მიადგა მარიამის ჯანმრთელობას ან რა შეიძლებოდა მომხდარიყო მკურნალობის გაგრძელების შემთხვევაში?

 

მარიამს ზონდის ჩადგმიდან დაახლოებით ერთ კვირაში დაეწყო ძილში სუნთქვის შეკავება დაახლოებით 7-8 წამით - ე.წ. ძილის აპნოე, რაც დღემდე გამოჰყვა და სიცოცხლისთვის ძალიან საშიშია. მეც უკიდურესად გამინადგურდა ჯანმრთელობა. გავხდი ჰიპერტონიკი და სამუდამოდ დავკარგე მეორე შვილის გაჩენის შესაძლებლობა.

 

- მას შემდეგ, რაც ირაკლი ფაღავას წერილობითი გაფრთხილება მისცეს და ოფიციალურად დადასტურდა მცდარი დიაგნოზი და მკურნალობა, ბოდიში თუ მოგიხადათ ვინმემ?

 

რა ბოდიში? მთელი კლინიკა და ჯანდაცვის სამინისტრო ჩემს წინააღმდეგ არიან განწყობილი! მაშინ ვიქნებოდი კარგი დედა, ხმა რომ არ ამომეღო! მათი აზრით, ბედნიერი უნდა ვიყო ჩემი შვილის გადარჩენით და სხვისი შვილები გავწირო! ჯანდაცვის სამინისტრო პროკურატურის მოთხოვნას უგულებელყოფს! ვინ არის ასეთი გავლენიანი სერგეენკო, რომ მთელ ქვეყანას თავის ჭკუაზე ატრიალებს და ვერავინ აიძულებს, სამართლიანი გადაწყვეტილების მიღებას?

 

უკვე ერთი წელია, პროკურატურამ მოითხოვა ყველა იმ ბავშვის ისტორია, რომელსაც აღნიშნული დაავადების დიაგნოზი დაუსვეს, თუმცა, დღემდე მათი ინტერესი არ შესრულებულა. ალბათ, მასობრივად აყალბებენ ისტორიებს და დროს წელავენ. სხდომის ოქმში წერია, რომ იპოვეს 8 ბავშვი, თუმცა, მხოლოდ 6 ბავშვის ისტორია მაქვს ხელთ. ყველას ნორმაში აქვს 17OHP! წარმოგიდგენიათ, საცოდავი მშობლები თავისი ხელით უსწრაფებენ შვილებს სიცოცხლეს, როდესაც ყოველდღიურად აძლევენ არასაჭირო ჰორმონებს! აქვე ვიტყვი, რომ მკურნალობა დანიშნულია ფრიად ვერაგული სქემით: ფაღავა ბავშვებს აძლევს ორ ჰორმონს - კორტინეფს და კორტეფს, რათა მშობლებს დაანახოს მდგომარეობის გაუმჯობესება მადის მომატების ფონზე; შესაბამისად, დაარწმუნოს, რომ მისმა მკურნალობამ შედეგი გამოიღო. ამ ჰორმონს დოზას იქამდე უზრდის, სანამ ბავშვი ჭამას არ დაიწყებს. კორტეფის  ანოტაციაში პირდაპირ წერია, რომ მედიკამენტი მადის მკვეთრ მატებას იწვევს. სხვათაშორის აღნიშნული ჰორმონი საქართველოში რეგისტრირებული არ იყო და მათი მითითებით კერძო ადამიანთან ვყიდულობდი. მოკლედ, უკიდურესად ჩახლართულია სიტუაციაა ამ სფეროში და რა შავბნელ სქემებთან თუ გარიგებებთან გვაქვს საქმე, ცალე  განხილვის თემაა.

 

- დაბოლოს, რას აპირებთ, ქალბატონო ქეთევან, თუკი სასურველ შედეგს ვერ მიაღწევთ?

 

მთელი დარჩენილი სიცოცხლეც  რომ დამჭირდეს, სიმართლეს მაინც დავამტკიცებ! ყველაფერს გავაკეთებ იმისათვის, რომ ყალბი  დიაგნოზით დაფეთებულმა მშობლებმა გაიგონ სიმართლე - მათ ჯანმრთელი შვილები ჰყავთ!

 

როგორც  ციხის ამბებს და პატიმრების წამებას შეეწირა სააკაშვილის რეჟიმი, „ოცნებაც“ ამ პატარების გაუბედურებას შეეწირება, რადგან შექმნილი სიტუაციის  გაანალიზებით გავაკეთე დასკვნა, რომ ჯანდაცვის სამინისტროს მფარველობით ჩვენს შვილებზე მედიკოსები ექსპერიმენტებს ატარებენ!

 

ბოლოთქმა:

ძვირფასო მკითხველო, ბრალდება, რომელსაც ქეთევან ღოლიჯაშვილი ენდოკრინოლოგ ირაკლი ფაღავას უყენებს, საკმაოდ მძიმეა, ამ შემთხვევაში, ჩვენ აუცილებლად დავინტერესდებით ი. ციციშვილის სახელობის ბავშვთა ახალი კლინიკისა და თავად ირაკლი ფაღავას პოზიციით, რომელიც საზოგადოებაში ჭკვიანი, გამოცდილი და სანდო ექიმის რეპუტაციით სარგებლობს.

 

ესაუბრა მეგი საჯაია

 

 

 

 

 

წყარო : wyaro
big_banner
არქივი