აშშ-ში, ბავშვებში ლეიკემიის მკურნალობის რევოლუციური მეთოდი ოფიციალურად დანერგეს. ახალი მეთოდი გენური ინჟინერიის საშუალებით პაციენტის სისხლში არსებულ იმუნურ უჯრედებს დაავადების წინააღმდეგ მიმართავს. აღნიშნული თერაპია პენსილვანიის უნივერსიტეტმა და კომპანია Novartis-მა შექმნეს. ეს არის პირველი შემთხვევა, როდესაც გენური თერაპია აშშ-ის ბაზარზე ხელმისაწვდომი გახდა. აშშ-ის წამლების ხარისხის კონტროლის სააგენტოში ახალი მეთოდის დანერგვას ისტორიული მოვლენა უწოდეს. როგორც „ვაშინგტონ პოსტთან" საუბარში ფილადელფიის ბავშვთა საავადმყოფოს ექიმმა სტივენ გრუპმა განაცხადა, აღნიშნული მეთოდი უკვე გამოიყენეს გოგონაზე, რომელიც მძიმე მდგომაროებაში იყო, თუმცა მკურნალობის შემდეგ ის უკვე ხუთი წელია კიბოსგან თავისუფალია.

ახალი მეთოდი გენურ თერაპიას დაავადების გამომწვევი გენების შესაცვლელად არ იყენებს, ის უბრალოდ ფილტრავს იმუნურ სისტემაზე პასუხისმგებელ უჯრედებს და მათ დაავადებასთან საბრძოლველად მიმართავს. მკურნალობის პროცესში ეს ერთგვარი ანტისხეულები ადამიანის ორგანიზმში მრავლდებიან და დიდი ხნის განმავლობაში უმკლავდებიან დაავადებას.

„ჩვენ სამედიცინო ინოვაციების ახალ ეტაპზე გადავდივართ, როდესაც ჩვენ შეგვიძლია ისე დავაპროგრამოთ პაციენტის უჯრედები, რომ მათ თავად შეძლონ კიბოზე თავდასხმა" - განაცხადეს აშშ-ის წამლების ხარისხის კონტროლის სააგენტოში.

პირველ რიგში, თერაპიას მწვავე ლიმფობლასტური ლეიკემიით დაავადებული პაციენტების სამკურნალოდ გამოიყენებენ. აღნიშნული დაავადების დიაგნოზს აშშ-ში ყოველწიურად 3000 ბავშვს და მოზარდს უსვამენ.

კვლევების მიხედვით, ახალი მეთოდის გამოყენებით მკურნალობის შემდეგ 63 პაციენტიდან, 83%-ის მდგომარეობა გაუმჯობესდა. ზოგიერთ შემთხვევაში დაფიქსირდა რეციდივი. პაციენტების ნაწილზე დაკვირვება გრძელდება.

როგორც ცნობილია, მკურნალობას აქვს უკუჩვენებებიც. მათ შორის არის ციებ-ცხელება, არტერიული წნევის ვარდნა და ზოგიერთ შემთხვევაში, ორგანოების დაზიანება. ამიტომ, თერაპიის პროცესი უკიდურესი სიფრთხილით უნდა წარიმართოს.

როგორც Novartis-ში ამბობენ, ბევრი პაციენტისთვის ახალი მეთოდი ძვლის ტვინის გადანერგვას ჩაანაცვლებს, რაც ტრადიციულად ძალიან ძვირი - დაახლოებთ ნახევარი მილიონი დოლარი ჯდება.

პირველ ეტაპზე, ლეიკემიის მკურნალობის ახალი მეთოდი, მისი სირთულიდან გამომდინარე, მხოლოდ რამდენიმე სამედიცინო დაწესებულებებში იქნება ხელმისაწვდომი. პაციენტების იმუნურ უჯრედებს გაყინავენ და ნიუ-ჯერსიში მდებარე ქარხანაში გაგზავნიან, საიდანაც თითოეული პაციენტი მათ დოზირებულად მიიღებს. ეს პროცესი სამი კვირა გრძელდება.

როგორც „ვაშინგტონ პოსტი" წერს, კიბოსთან ბრძოლის ახალ გენურ მეთოდებზე უკვე მუშაობენ სხვა კომპანიებიც. წლის ბოლოს ეროვნული ონკოლოგიური ინსტიტუტის მიერ შემუშავებული თერაპია, სავარაუდოდ, ლიცენზირების პროცესს გაივლის და აგრესიული ლიმფომას განკურნებასაც შეძლებს. მეცნიერები ასევე აქტიურად მუშაობენ მკურნალობის აღნიშნული მეთოდის კიბოს ისეთი მძიმე ფორმების წინააღმდეგ გამოსაყენებლად, როგორიცაა ტვინის, მკერდი ამ პანკრეასის კიბო.

წყარო :