„რუსეთი ამერიკის შეერთებულ შტატებთან ურთიერთობის გაუმჯობესებისთვის ყველაფერს გააკეთებს“, - ამის შესახებ ვლადიმირ პუტინმა იაპონიის ქალაქ ოსაკაში, „დიდი ოცეულის“ სამიტის ფარგლებში გამართულ პრესკონფერენციაზე განაცხადა.
ჟურნალისტის კითხვას, ვაშინგტონის მხრიდან სანქციების შესაძლო გაფართოებასთან დაკავშირებით, რუსეთის პრეზიდენტმა უპასუხა, რომ ეს ამერიკის შეერთებულ შტატებზეა დამოკიდებული. ვლადიმირ პუტინის განმარტებით, ვაშინგტონმა უნდა გადაწყვიტოს, რა არის საუკეთესო გზა მოსკოვთან ურთიერთობის დარეგულირებისთვის.
ამასთან ერთად, რუსეთის პრეზიდენტმა განაცხადა, რომ სირიის საკითხთან დაკავშირებით მოსკოვი ამერიკის შეერთებულ შტატებთან დიალოგს აწარმოებს. ვლადიმირ პუტინის განმარტებით, მხარეები ტერორიზმის წინააღმდეგ ბრძოლაში მუდმივ კონტაქტში იმყოფებიან.
პრესკონფერენციის დროს ვლადიმირ პუტინმა სამიტის ფარგლებში დონალდ ტრამპთან გამართულ შეხვედრას სასარგებლო უწოდა, რადგან მათ მსოფლიოს სხვადასხვა რეგიონებში არსებული ვითარება განიხილეს.