ვერტმფრენი, რომელშიც ლეგენდარული კალათბურთელი კობი ბრაიანტი და მისი 13 წლის შვილი ჯინა მარია, იმყოფებოდნენ, სავარაუდოდ, ცუდი ხილვადობის გამო ჩამოვარდა.
გამოცემა „TMZ“, ლოს-ანჯელესის პოლიციის დეპარტამენტში წყაროზე დაყრდნობით იტყობინება, რომ ადგილზე, სადაც ავიაკატასტროფა მოხდა, ძლიერი ნისლი იყო.
„TMZ“-მა დისპეტჩერის საუბრის ჩანაწერი გაავრცელა. პორტალი აღნიშნავს, რომ პილოტი ამინდთან დაკავშირებულ პრობლემას პირველად მაშინ წააწყდა, როდესაც ლოს-ანჯელესის ზოოპარკის თავზე მიფრინავდა. აღნიშნულ ტერიტორიას მან დაბალ სიმაღლეზე ექვსჯერ გადაუფრინა.
„შესაძლოა, პილოტი ვარაუდობდა, რომ ნისლი გაიფანტებოდა“, – ნათქვამია მასალაში.
ჩამოვარდნამდე ვერტმფრენი ერთ ტერიტორიაზე 15 წუთის განმავლობაში დაფრინავდა. რამდენიმე წუთის შემდეგ პილოტმა სიმაღლე უეცრად აიღო და რამდენიმე წუთში ჩამოვარდა.