ამერიკის შეერთებული შტატების პრეზიდენტმა დონალდ ტრამპმა და პირველმა ლედიმ, მელანია ტრამპმა ინდოეთში ვიზიტის დროს ქალაქ აგრაში მდებარე ტაჯ-მაჰალი დაათვალიერეს.
ინფორმაციას სააგენტო „როიტერი“ ავრცელებს.
ეს დონალდ ტრამპის პირველი ვიზიტია ინდოეთში.
ამერიკის პრეზიდენტი მეუღლესთან ერთად ინდოეთში დღეს დილით ჩაფრინდა და ინდოეთის პრემიერ-მინისტრ ნარენდრა მოდის შეხვდა.
დიპლომატიურ მოლაპარაკებებს ორი ქვეყნის ლიდერი ხვალ გააგრძელებს. მოლაპარაკებების მთავარი თემა სავაჭრო ურთიერთობები იქნება.
დონალდ ტრამპი ინდოეთში 36-საათიანი ვიზიტით იმყოფება. ის უკვე შეხვდა ინდოეთის პრემიერ მინისტრ ნარენდრა მოდის და ერთ-ერთ სტადიონზე შეკრებილ მოქალაქეებს სიტყვით მიმართა.
მან აღნიშნა, რომ „ინდოეთს ყოველთვის ექნება განსაკუთრებული ადგილი ამერიკელების გულებში“.
დონალდ ტრამპსა და მელანია ტრამპს აგრაში საზეიმო მიღებაც მოუწყვეს.