კორონავირუსის საფრთხის შედეგად მსოფლიოს 500 უმდიდრესმა ადამიანმა ერთ დღეში 139 მილიარდი დოლარი დაკარგა.
გამოცემა „Bloomberg“-ის ცნობით, ეს ყველაზე დიდი შემცირებაა რეიტინგის არსებობის ისტორიაში.
ვირუსის პანდემიის საფრთხე საფონდო ბირჟებზე ინდექსების მკვეთრი ვარდნის მიზეზი გახდა.
გავრცელებული ცნობით, ყველაზე დიდი ფინანსური დანაკარგი ფრანგული კომპანია „LVMH“-ის მფლობელმა ბერნარ არნომ და „Amazon“-ის მფლობელმა ჯეფ ბეზოსმა მიიღეს. თითოეულმა ერთ დღეში 4.8 მილიარდი დოლარი დაკარგა.
ესპანური სავაჭრო ქსელის, „Zara“-ს მფლობელმა ამანსიო ორტეგამ ერთ დღეში $4 მილიარდი იზარალა, „Facebook“-ის დამფუძნებელმა მარკ ცუკერბერგმა კი - $3.48 მილიარდი.
24 თებერვალს მსოფლიოს ძირითადი საფონდო ინდექსები საგრძნობლად შემცირდა. მაგალითად, S&P-ის ინდექსის კლებამ 3,5% შეადგინა.
დაახლოებით ამდენივე იყო Dow Jones-ის ინდექსის კლებაც.
ცნობისთვის, 30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა.