შვეიცარიის ალპების სოფელ მითხოლცის მცხოვრებლებს მინიმუმ 10 წლით გაასახლებენ, სანამ მეორე მსოფლიო ომისდროინდელ სამხედო მასალების საწყობის ლიკვიდირება არ მოხდება. ინფორმაციას Swissinfo ავრცელებს.
საწყობში დაახლოებით 3,5 ათასი ტონა ტყვია-წამალი და რამდენიმე ასეული ტონა ასაფეთქებელი ნივთიერებები ინახება.
1947 წელს ამ ადგილას ტრაგედია მოხდა - არსენალის ნახევარი აფეთქდა და 9 ადამიანი დაიღუპა. შვეიცარიის თავდაცვის სამინისტროში შიშობენ, რომ შეიძლება კვლავ მოხდეს მსგავსი ინციდენტი. საწყობის იატაკმა დაიწია, საბრძოლო მასალის ნაწილი კი ჩამოყრილი ქვებით არის დაფარული.
საბრძოლო მასალის უტილიზაცია და საწყობის ლიკვიდაცია, სავარაუდოდ, 1 მლრდ შვეიცარიულ ფრანკზე მეტი დაჯდება.
სოფლის 170 მცხოვრებს უკვე შესთავაზეს 10 წლით სხვაგან გადასახლდნენ ან კომპენსაცია მიიღონ საცხოვრებლის სამუდამოდ შეცვლის გამო. კონსულტაციები აპრილის შუა რიცხვებამდე გაგრძელდება.