აშშ-ის დაავადებათა კონტროლის ცენტრი შტატების ჯანდაცვის უწყებებს მოუწოდებს, ნოემბრის თვეში „კოვიდ-19“-ის საწინააღმდეგო ვაქცინის დისტრიბუციისთვის მზად იყვნენ.
„ნიუ იორკ თაიმსის“ ინფორმაციით, დაავადებათა კონტროლის ცენტრმა ოფიციალური გაფრთხილება უკვე 50-ვე შტატის ჯანდაცვის უწყებებში გადააგზავნა.
დაავადებათა კონტროლის ცენტრის განცხადებით, შტატებში ვაქცინის დისტრიბუცია ოქტომბრის ბოლოს ან ნოემბრის დასაწყისში იქნება შესაძლებელი. ჯანდაცვის მუშაკები და მაღალი რისკის ჯგუფის წარმომადგენლები ვაქცინას პირველები მიიღებენ.
„ნიუ იორკ თაიმსის“ ცნობით, დაავადებათა კონტროლის ცენტრის განცხადების პარალელურად, აშშ-ის პრეზიდენტმა დონალდ ტრამპმა რესპუბლიკელთა ეროვნულ ყრილობაზე განაცხადა, რომ მოსახლეობა „კოვიდ-19“-ის საწინააღმდეგო ვაქცინას წლის ბოლომდე მიიღებს.