ინდოეთში ჰიმალაის შტატ უტარაკჰანდში მყინვარის ნაწილის ჩამოშლის შემდეგ წყლის მოვარდნის შედეგად დაღუპულთა რაოდენობა 18-მდე გაიზარდა.
მედიის ინფორმაციით, ამ დროისთვის 200-მდე ადამიანი დაკარგულად ითვლება.
მაშველები 2 კილომეტრამდე სიგრძის გვირაბში მოყოლილი ათობით მუშის პოვნასა და გადარჩენას ამ დრომდე ცდილობენ. ადგილობრივი პოლიციის ინფორმაციით, გვირაბის დაახლოებით 80 მეტრი გაწმენდილია, 100 მეტრზე მეტი კი ჯერ კიდევ გასაწმენდი რჩება.
ხელისუფლებამ სამძებრო-სამაშველო სამუშაოებისთვის რეგიონში ასობით ჯარისკაცი და სამხედრო ვერტმფრენი გააგზავნა.
მომხდარს გამოეხმაურა ქვეყნის პრემიერ-მინისტრი ნარენდრა მოდი, რომელმაც აღნიშნა, რომ ყურადღებით აკვირდება სიტუაციას.