ისრაელში, მერონის მთაზე მომხდარი ტრაგედიის გამო, დღეს ეროვნული გლოვის დღეა, - ამის შესახებ Reuters- წერს.
ამავე სააგენტოს ცნობით, რელიგიურ ფესტივალზე მომხდარი ჭყლეტისას დაღუპულებს შორის ამერიკის მოქალაქეებიც არიან.
„შეგვიძლია დავადასტუროთ, რომ აშშ-ის არაერთი მოქალაქეა დაშავებულთა შორისაც“, - აღნიშნულია ამერიკის საელჩოს განცხადებაში.
ერთ-ერთი დაღუპულის, 13 წლის ბიჭის მამა იხსენებს, რომ ჭყლეტის დროს მთელი სხეული დაბუჟებული ჰქონდა და მხედველობა დაებინდა.
„ჩემი შვილი ყვიროდა: „მამა მე მოვკვდები“, - იხსენებს კაცი, რომელიც საავადმყოფოდან ცოტა ხნის წინ, შვილის დაკრძალვაზე დასასწრებად გაწერეს.
ისრაელის ჯანდაცვის სამინისტროს ცნობით, ამ დროისთვის, დაღუპული 45 ადამიანიდან 42-ის ამოცნობა მოხერხდა.
ტრაგედია მერონის მთაზე მოხდა, სადაც ლაგ ბა-ომერის ფესტივალი იმართებოდა. შეზღუდვების მიუხედავად, იქ ათობით ათასი ადამიანი შეიკრიბა.