ევროპის წამლის სააგენტოს (EMA) კომიტეტმა მონოკლონური ანტისხეულების პრეპარატების, Ronapreve-სა და Regkirona-ს ავტორიზაციას რეკომენდაცია გაუწია. ინფორმაციას ამის შესახებ ევროკავშირის მარეგულირებელი ავრცელებს.

კომიტეტმა რეკომენდაცია გაუწია Ronapreve-ს ავტორიზაციას ზრდასრულებსა და მოზარდებში (12 წლის ასაკიდან, რომელთა წონა, სულ მცირე, 40 კილოგრამია) COVID-19-ის სამკურნალოდ, რომლებსაც არ ესაჭიროებათ დამატებითი ჟანგბადი და რომლებსაც დაავადების გაუარესების რისკი აქვთ.

რაც შეეხება Regkirona-ს, კომიტეტმა რეკომენდაცია გაუწია პრეპარატის ავტორიზაციას COVID-19-ით დაავადებული ზრდასრულების სამკურნალოდ, რომლებსაც არ ესაჭიროებათ დამატებითი ჟანგბადი და რომლებსაც დაავადების გაუარესების რისკი აქვთ.

ევროპის წამლის სააგენტოს (EMA) კომიტეტი თავის რეკომენდაციებს ევროკომისიას გაუგზავნის იურიდიულად სავალდებულო გადაწყვეტილების მისაღებად.

Ronapreve-მ გადაუდებელი გამოყენებისთვის ავტორიზაცია 20-ზე მეტ ქვეყანაში, მათ შორის გაერთიანებულ სამეფოსა და შეერთებულ შტატებში მიიღო.

პრეპარატ Ronapreve-ს შეუძლია ხელი შეუწყოს ინფექციის თავიდან აცილებას, ინფექციის მძიმე სიმპტომების აღმოფხვრასა და ჰოსპიტალიზაციის შესაძლებლობის შემცირებას.

პრეპარატის შეყვანა ინექციით ან ინფუზიით ხდება. იგი სასუნთქი სისტემის ლორწოვან გარსზე მოქმედებს, სადაც მჭიდროდ ეკვრება კორონავირუსს და ხელს უშლის მას სასუნთქი სისტემის უჯრედებზე წვდომაში.

Ronapreve-ი იმ წამლების კლასს მიეკუთვნება, რომელსაც მონოკლონურ ანტისხეულებს უწოდებენ. ისინი სხეულის მიერ წარმოებული ბუნებრივი ანტისხეულების იმიტაციას ახდენენ. პრეპარატის გამოყენება ვაქცინაციის ჩანაცვლებას არ გულისხმობს.

წყარო :