„რა თქმა უნდა, ადამიანის უფლებები უნდა იყოს დაცული, ჩვენ არავის უფლებებში არ ჩავერევით, მაგრამ ჩვენ არ უნდა დავუშვათ, რომ არასრულწლოვანებს ტვინი გამოულაყონ ამ წარმოუდგენელი იდეოლოგიით. ამიტომ ეს პროპაგანდა ჩაიკეტება და მისი თანმხლები მოვლენებიც, სამედიცინო მანიპულაციები და ასე შემდეგ, აღმოფხვრილი და აკრძალული იქნება საქართველოში“, – განაცხადა საპარლამენტო უმრავლესობის წევრმა თენგიზ შარმანაშვილმა რუსთავში, საკონსტიტუციო ცვლილებებთან დაკავშირებით საყოველთაო-სახალხო განხილვის საორგანიზაციო კომისიის მოსახლეობასთან შეხვედრაზე.
თენგიზ შარმანაშვილმა იმ საფრთხეებზე ისაუბრა, რის პრევენციასაც წარმოდგენილი საკანონმდებლო ცვლილება გულისხმობს.
„წარმოვიდგინოთ მთელი დრამატიზმი როგორ ვითარდება ეს სამყარო და რისგან გვაქვს თავი დასაცავი. როდესაც 1995 წელს, ქვეყანა კონსტიტუციის რედაქციას იღებდა, იქ ეწერა, რომ ოჯახი არის მეუღლეთა ერთობა. მაშინ ამაზე შენიშვნა არავის გამოუთქვამს, არავის დაესიზმრებოდა, რომ მეუღლე შეიძლება ყოფილიყო ვინმე გარდა ქალისა და კაცისა. არც პრევენცია მოგვიხდენია, არც ეს საშიშროება დაუნახავს ვინმეს, არც სასულიერო პირს, არც ჩვენ, იმდენად ნორმალურ მოვლენად მიგვაჩნდა, მაგრამ შემდეგ სამყარო ისეთი მიმართულებით განვითარდა, რომ ხანდახან გონება ვეღარ ეწევა მოვლენების განვითარებას“, – განაცხადა თენგიზ შარმანაშვილმა.
მისივე თქმით, 2017 წელს, ოჯახის განმარტებისთვის საჭირო გახდა „ქალისა და კაცის ერთობის“ კონსტიტუციაში ჩაწერა.
„ესეც არ აღმოჩნდა საკმარისი. ჩვენს პროექტში აღმოაჩენთ, რომ უკვე სიტყვა „გენეტიკური ქალი“ და „გენეტიკური კაცი“ გავაჩინეთ. იმიტომ, რომ თურმე ეს არჩევანი ყოფილა და მხოლოდ „ქალი“ და „კაცი“ რომ დავტოვოთ, შეიძლება ვინმემ განმარტოს, რომ ეს არჩევანზეა დამოკიდებული. რაღაცის დამატება და დაზუსტება გვიწევს, რომელიც შეიძლება 3-4 წლის წინ ვერც კი გაგვეთვალისწინებინა, ისე ვითარდება ეს ფსევდოლიბერალური იდეოლოგია მსოფლიოში, რაც ძალიან დიდ საფრთხეს წარმოადგენს“, – აღნიშნა თენგიზ შარმანაშვილმა.
მან ასევე ისაუბრა არასრულწლოვანთა დაცვის შესახებ.
„მაგალითად, ზოგიერთ ქვეყანაში საბავშვო ბაღში ასწავლიან, შენ ხარ ბავშვი და რომ გაიზრდები მერე აირჩევ – ვინ ხარ ბიჭი თუ გოგო. ამას ეუბნებიან 4-5 წლის ბავშვებს და აქეთ მიდის სამყარო“ , – განაცხადა თენგიზ შარმანაშვილმა.