ირაკლი ქადაგიშვილი: საქმე გვაქვს ერთ „ნაციონალურ მოძრაობასთან“, რომელიც იყო საქართველოში ტრაგედიისა და ომის თანაავტორი, რამდენ ნაწილადაც უნდა დაიშალონ, ეს მათ საერთო სახეს არ ცვლის
რეალურად, საქმე გვაქვს ერთ „ნაციონალურ მოძრაობასთან“, რომელიც საქართველოში ტრაგედიისა და ომის თანაავტორი იყო. ისინი დღესაც იმავე პოლიტიკის გამგრძელებელი არიან, – ამის შესახებ საპარლამენტო უმრავლესობის წევრმა, საპროცედურო საკითხთა და წესების კომიტეტის თავმჯდომარემ, ირაკლი ქადაგიშვილმა განაცხადა.
მისი თქმით, „ნაციონალური მოძრაობისგან“ გამოყოფა და გარკვეული გადაადგილებები საერთო სურათს არ ცვლის.
„ამ კონგლომერატში რა გადაადგილება მოხდება, რამდენ ნაწილად დაიშლებიან, შემდეგ რაღაც ნაწილები გაერთიანდებიან თუ არა, ეს მათ საერთო სახეს, მოცემულობასა და სურათს არ ცვლის. მათი ელექტორატი ძირითადად ერთგვაროვანია – ეს ძირითადად არის „ნაციონალური მოძრაობის“ ელექტორატი, რომელზეც დაშლილი თუ ხან გაერთიანებული „ნაციონალური მოძრაობის“ ნაწილებს შორის ახლა ნადირობა მიმდინარეობს. აქედან გამომდინარე, ამას რაიმე პრინციპული სიახლე ან მნიშვნელობა საქართველოს პოლიტიკურ ცხოვრებაში არ აქვს და არც ელექტორალურად იწვევს რაიმე მნიშვნელოვან ცვლილებებს. ფაქტია, რომ მათი არეალი მკაფიოდ არის შემოსაზღვრული, 25-30 პროცენტის ფარგლებში“, – აღნიშნა ირაკლი ქადაგიშვილმა.