ოლაფ შოლცი: აშშ-ს და ევროპას ერთად ბევრად მეტის მიღწევა შეუძლიათ, ვიდრე ერთმანეთის წინააღმდეგ
გერმანიის კანცლერი ოლაფ შოლცი დონალდ ტრამპს აშშ-ში გამარჯვებას ულოცავს და აცხადებს, რომ აშშ-ს და ევროპას „ერთად ბევრად მეტის მიღწევა შეუძლიათ, ვიდრე ერთმანეთის წინააღმდეგ“.
სატელევიზიო გამოსვლისას კანცლერმა აღნიშნა, რომ დონალდ ტრამპის პრეზიდენტობის დროს ბევრი რამ ნამდვილად შეიცვლება.
„ამერიკელებმა არჩევანი გააკეთეს. დონალდ ტრამპმა ცხადად გაიმარჯვა არჩევნებში. ვულოცავ მას. პრეზიდენტ ტრამპი თანამდებობას დიდი გამოწვევებისა და კრიზისების პერიოდში დაიკავებს. აშშ-ს და მის პრეზიდენტებს ცენტრალური როლი აქვთ მათ გადალახვაში. სწორედ ამიტომ, აშშ-ის არჩევნებს ყოველთვის აქვს შედეგები ამერიკის ფარგლებს გარეთ. ამერიკის ახალ მთავრობას ჯერ უფლებამოსილება არ გადაუბარებია. ბევრ სფეროში მას ჯერ კიდევ მოუწევს მომავალი კურსის განსაზღვრა. ამიტომ, ჩვენთვის მით უფრო მნიშვნელოვანია, გავაგრძელოთ ვაშინგტონთან კომუნიკაციის ჩვენი არხების გამოყენება, რათა სწრაფად ჩამოვაყალიბოთ ჩვენი სამუშაო ურთიერთობები აშშ-ის ახალ მთავრობასთან და შევათანხმოთ ჩვენი პოზიციები. ბევრი რამ ნამდვილად შეიცვლება დონალდ ტრამპის ადმინისტრაციის პირობებში. დონალდ ტრამპი ამაზე ყოველთვის საჯაროდ, ცხადად მიანიშნებდა“, – განაცხადა ოლაფ შოლცმა.
ამასთან, გერმანიის კანცლერმა განაცხადა, რომ ევროკავშირმა ერთიანად უნდა იმოქმედოს, რაზეც ის საფრანგეთის პრეზიდენტს, ემანუელ მაკრონსესაუბრა.
„ჩვენი გზავნილი ნათელია. პირველი – გერმანია ყოველთვის დარჩება სანდო ტრანსატლანტიკურ პარტნიორად. ჩვენ ვაცნობიერებთ იმ წვლილს, რომელიც ამ პარტნიორობაში შეგვაქვს და გავაგრძელებთ მომავალში. ეს ასევე ეხება იმ საფრთხეს, რომელსაც NATO-ს ყველა წევრი მიიჩნევს, რომ რუსეთი უქმნის ევროატლანტიკურ უსაფრთხოებას; მეორე – ევროკავშირი უნდა დადგეს ერთად და იმოქმედოს ერთიანად. როგორც გერმანიის კანცლერი, მე ვმუშაობ ამაზე. მე ვესაუბრე დღეს პრეზიდენტ მაკრონს; მესამე პუნქტი მდგომარეობს იმაში, რომ ორივე მხარე იღებს სარგებელს ტრანსატლანტიკური ურთიერთობებისგან. სწორედ ამიტომ, ჩვენთვის ერთად ყოფნა უკეთესია. ერთად ჩვენ ბევრად მეტის მიღწევა შეგვიძლია, ვიდრე ერთმანეთის წინააღმდეგ“, – თქვა შოლცმა.