ნატოს გენერალურმა მდივანმა განაცხადა, რომ უკრაინაში ომის დასრულების შემდეგ დასავლეთს შეუძლია რუსეთთან ურთიერთობების ნორმალიზება
ნატოს გენერალურმა მდივანმა, მარკ რუტემ განაცხადა, რომ უკრაინაში ომის დასრულების შემდეგ დასავლეთს შეუძლია რუსეთთან ურთიერთობების ნორმალიზება. ინფორმაციას ამის შესახებ უკრაინული მედია ავრცელებს.
Bloomberg Business News-თან საუბრისას ჩრდილოატლანტიკური ალიანსის ხელმძღვანელმა იმედი გამოთქვა, რომ საომარი მოქმედებების დასრულების შემდეგ, ამერიკის შეერთებული შტატები და ევროპა „ნაბიჯ-ნაბიჯ“ აღადგენენ ნორმალურ ურთიერთობებს რუსეთთან.
ამასთან, მან აღნიშნა, რომ ეს საკითხი არ არის აქტუალური, ვიდრე უკრაინის წინააღმდეგ ომი გრძელდება.
„ჯერ იქ არ ვართ. ჩვენ უნდა გავაგრძელოთ მათზე [რუსებზე] ზეწოლა, რათა დავრწმუნდეთ, რომ ისინი მზად არიან სერიოზულად ჩაერთონ მოლაპარაკებებში ამერიკის ადმინისტრაციასთან და, რა თქმა უნდა, უკრაინელებთან“, – აღნიშნა ნატოს გენერალურმა მდივანმა.
