საქართველოში სამუშაო ვიზიტით NATO-ს გაერთიანებული ძალების საწვრთნელი ცენტრის (JFTC) მეთაურის მოადგილე, ბრიგადის გენერალი პეტრ სვობოდა და JFTC-ის წვრთნებისა და სწავლებების განყოფილების წარმომადგენელი, პოლკოვნიკი ლადისლავ სვეზდა იმყოფებოდნენ. NATO-ელ სტუმრებს კრწანისში, NATO-საქართველოს წვრთნებისა და შეფასების ერთობლივ ცენტრში (JTEC) უმასპინძლეს.
ცენტრის მეთაურმა, პოლკოვნიკმა დავით გაგუამ საინფორმაციო ბრიფინგზე მათ JTEC-ის ისტორია, ამოცანები, განხორციელებული პროექტები და გეგმები გააცნო. შეხვედრაზე აღინიშნა NATO-საქართველოს წვრთნებისა და შეფასების ერთობლივ ცენტრსა (JTEC) და NATO-ს გაერთიანებული ძალების საწვრთნელ ცენტრს (JFTC) შორის მრავალწლიანი ნაყოფიერი თანამშრომლობა, JTEC-ის განვითარების პროცესში JFTC-ის მხრიდან გაწეული მხარდაჭერა. საუბრის ერთ-ერთ მთავარ თემას წარმოადგენდა სწავლება „NATO-საქართველო 2025“, რომელიც საქართველოში მიმდინარე წელს ჩატარდება. NATO-ს გაერთიანებული ძალების საწვრთნელი ცენტრის (JFTC) მეთაურის მოადგილემ დეტალური ინფორმაცია მიიღო სწავლების დაგეგმვისა და მოსამზადებელი სამუშაოების შესახებ, რომელიც დასკვნით ფაზაშია.
საქართველოში სამდღიანი ვიზიტის განმავლობაში NATO-ს გაერთიანებული ძალების საწვრთნელი ცენტრის (JFTC) წარმომადგენლებმა შეხვედრები გამართეს საქართველოს თავდაცვის ძალების მეთაურის მოადგილესთან, გენერალ-მაიორ ზაზა ჩხაიძესთან, თავდაცვის ძალების სხვადასხვა სტრუქტურული ერთეულის წარმომადგენლებთან. სტუმრებმა JTEC-ის შემადგენლობაში არსებული საბრძოლო მომზადების ცენტრიც (CTC) მოინახულეს.
NATO-საქართველოს წვრთნებისა და შეფასების ერთობლივმა ცენტრმა (JTEC) პოლონეთში მდებარე NATO-ს გაერთიანებული ძალების საწვრთნელ ცენტრთან (JFTC) მჭიდრო თანამშრომლობა 2017 წელს მენტორული პროგრამის საფუძველზე დაიწყო. 2020 წელს მათ შორის პარტნიორობის შეთანხმება გაფორმდა.
