საავტომობილო გზების დეპარტამენტი, მოვლა-შენახვის ფარგლებში, გზის საფარის აღდგენით სამუშაოებს ინტენსიურ რეჟიმში აგრძელებს. ასევე, ხორციელდება საავტომობილო გზების ჰორიზონტალური მონიშვნის სამუშაოები.

„მკაცრმა ზამთარმა, კერძოდ, დიდთოვლობამ, ძლიერმა ყინვამ და გზაზე მოძრაობის შესანარჩუნებლად ტექნიკური მარილის დაყრამ, საავტომობილო  გზები მნიშვნელოვნად დააზიანა. მეტეოროლოგიური პირობების გაუმჯობესებისთანავე, დეპარტამენტის კონტრაქტორმა ორგანიზაციებმა დაზიანებული გზების შეკეთების სამუშაოები დაიწყეს.

ამ ეტაპზე, მთელი საქართველოს მასშტაბით, ზამთრის პერიოდში დაზიანებული გზების 70%-ზე აღდგენითი სამუშაოები დასრულებულია. დაბლობში მიმდინარე შეკეთების სამუშაოები უახლოეს დღეებში დასრულდება. რაც შეეხება მაღალმთიან რეგიონებს, აქ გზის აღგენითი სამუშაოები მეტეოროლოგიური პირობებიდან გამომდინარე აპრილში დაიწყება და ეტაპობრივად ჩატარდება", - ნათქვამია საავტომობილო გზების დეპარტამენტის მიერ გავრცელებულ განცხადებაში.