„ჩვენი თანამშრომლობა თავდაცვის უნარიანობის ამაღლებასა და ქვეყნის მდგრადობას ემსახურება“, - ამის შესახებ საქართველოს თავდაცვის მინისტრმა, ჯუანშერ ბურჭულაძემ სამინისტროში გამართულ ბრიფინგზე განაცხადა, სადაც აშშ-ის თავდაცვის დეპარტამენტთან თანამშრომლობის შესახებ შეთანხმება გაფორმდა.
მან ისაუბრა ნატო-საქართველოს წვრთნისა და შეფასების ერთობლივ ცენტრის შესახებ და მის ერთ-ერთ მთავარ კომპონენტზე საბრძოლო მომზადების ცენტრზე, რომელიც მინისტრის თქმით, აშშ-ის თანადაფინანსებით ხორციელდება.
საქართველოს თავდაცვის მინისტრმა მადლობა გადაუხადა ამერიკის შეერთებული შტატების თავდაცვის მდივანს, ლოიდ ოსტინს აშშ-ის მთავრობის მიერ საქართველოსთვის გაწეულ დახმარების გამო.
„მინდა მადლობა გადავუხადო ბატონ აშშ-ის თავდაცვის მდივანსა და აშშ-ის მთავრობას საქართველოს სახელით იმ უმნიშვნელოვანესი, სტრატეგიული და წარმატებული თანამშრომლობისთვის, რაც საქართველოს, როგორც ალიანსის მომავალი წევრის მიმართ, ისინი იჩენენ. ჩვენი თანამშრომლობა თავდაცვის უნარიანობის ამაღლებასა და ქვეყნის მდგრადობას ემსახურება“, - განაცხადა ბურჭულაძემ.
საქართველოს თავდაცვის სამინისტროსა და აშშ-ის თავდაცვის დეპარტამენტს შორის გაფორმდა შეთანხმება, რომლის მიზანი საქართველოს თავდაცვისუნარიანობისა და შეკავების შესაძლებლობების გაძლიერებაა.