Amazon-ი სერიალის „კარგი ნიშნები“ მეორე სეზონს გადაიღებს. ამის შესახებ Deadline-ი წერს.
გამოცემის ინფორმაციით, მეორე სეზონი 6 სერიისგან შედგება. გადაღებები კი წლის ბოლომდე, შოტლანდიაში დაიწყება. თავიანთ როლებს დაუბრუნდებიან მაიკლ შინი და დევიდ ტენანტი.
„კარგი ნიშნები“ ნილ გეიმანისა და ტერი პრატჩეტის წიგნზეა დაფუძნებული: „კარგი ნიშნები: ალქაჯ აგნეს ნატერის კარგი და ზუსტი წინასწარმეტყველებები“. სიუჟეტის მიხედვით, ლონდონში მცხოვრები ანგელოზი აზირაფელი (მაიკლ შინი) და დემონი კროული (დევიდ ტენანტი) სამყაროს აპოკალიფსისგან გადარჩენას ცდილობენ.
ახალი სეზონი ორიგინალურ სცენარზე იქნება დაფუძნებული.